Ýaqyt talabynan týyndaǵan bastama

Senat Elbasy N.Á.Nazarbaevqa kezekten tys prezıdenttik saılaýdy taǵaıyndaý týraly máseleni qaraýdy ótingen úndeý qabyldady

Keshe Qasym-Jomart Toqaevtyń tóraǵalyq etýimen Parlament Senatynyń otyrysy bolyp, onda palata Qazaqstan halqy Assambleıasy Keńesiniń merziminen buryn prezıdenttik saılaýdy ótkizý týraly bastamasyn biraýyzdan qoldady jáne Qazaqstan Respýblıkasynyń Prezıdenti, Elbasy N.Á.Nazarbaevqa saılaýdy taǵaıyndaý týraly máseleni qaraýdy ótingen Senat úndeýin qabyldady. Úndeýdi oqyǵan joǵary palatanyń basshysy ýaqyt talabynan týyndap otyrǵan bastama barsha halyqtyń qyzý qoldaýyna ıe bolyp, Qazaqstan qoǵamynda oń pikirler týǵyzǵanyn atap ótti. Senat Tóraǵasynyń pikirinshe, halyqaralyq ahýal shıelenisken, álemde qaqtyǵysty jaǵdaılar týyndaǵan jáne jahandyq ekonomıkadaǵy daǵdarystyq qubylýlar oryn alyp otyrǵan ýaqytta ishki saıası turaqtylyq qamtamasyz etilip, álemniń eń damyǵan elderiniń tobyna kirý maqsatyn kózdeıtin uzaq merzimdi «Qazaqstan-2050» Strategııasyn, «Máńgilik El» tujyrymdamasyn, «Nurly Jol» baǵdarlamasyn tabysty iske asyrý úshin qolaıly jaǵdaılar jasalýy tıis. Senatorlar úndeýinde Elbasynyń dana jáne myqty kóshbasshylyǵynyń arqasynda Qazaqstan halqy elimizdiń qalyptasýy men damýyndaǵy barlyq qıyndyqtardy abyroımen eńsergeni aıtyldy: «Siz táýelsizdik jyldarynda damyǵan naryqtyq ekonomıkasy, halyqaralyq qoǵamdastyqtaǵy bedeldi ustanymdary bar tabysty memleket qura bildińiz. Sondyqtan da, qazaq­stan­dyqtardyń búgingi tańdaǵy bar­lyq jetistikterin: turaq­ty eko­nomıkalyq ósýdi, demokratııanyń damýyn, ultaralyq kelisim men áleýmettik ıgiligin Sizdiń esi­mińizben baılanystyrýy zańdy», delingen úndeýde. Joǵary palatanyń basshysy Qazaqstan óz damýynyń jańa satysyna aıaq basqanyn atap ótti. Osy oraıda, dedi ol, belgilengen reformalardy odan ári júrgizýge baǵyttalǵan Elbasynyń baǵdaryn tabysty júzege asyrýdyń sóz­siz sharty bolyp tabylatyn turaqtylyqtyń mańyzy zor. «Biz, Parlament Senatynyń depýtattary, kezekten tys prezıdenttik saılaý ótkizý elimizde beıbitshilikti, birlik pen kelisimdi nyǵaıtýǵa yqpal etetindigine senimdimiz», – dedi Q.Toqaev. Senatorlar M.Altynbaev, M.Bortnık, G.Kım, E.Saǵyndyqov, B.Beknazarov Qazaqstan halqy Assambleıasy Keńesiniń bastamasyn qoldap, sóz sóıledi. Otyrys barysynda senatorlar Qazaqstan men О́zbekstan Úkimetteri arasyndaǵy Adam­dar­dyń readmıssııasy týraly keli­simdi jáne osy kelisimdi iske asyrý tártibi týraly Atqarý hat­tamasyn ratıfıkasııalady. Kelisim eki memlekettiń aýmaǵyna kelý, onda bolý nemese turý sharttaryn oryndamaıtyn nemese oryndaýdy toqtatqan adamdardy anyqtaýdyń jáne qaýipsiz ári retimen qaıtarýdyń tıimdi rásimderin aıqyndaıdy, sondaı-aq, osyndaı adamdardyń tranzıtine yqpalyn tıgizetin bolady. Palata Keden odaǵyna múshe memleketter bolyp tabylmaıtyn, Táýelsiz Memleketter Dos­tas­tyǵyna qatysýshy memleket­termen ózara saýdadaǵy tehnı­kalyq kedergilerdi joıý týraly Keden odaǵyna múshe memle­ket­terdiń kelisimin ratıfı­ka­sııalady. Qujatty qabyl­daý saýda-ekonomıkalyq ynty­maq­tastyqtyń tıimdiligin arttyrýǵa, ınvestısııalyq ózara is-qımyl­dy keńeıtýge, ózara saýda kóle­min ulǵaıtýǵa jáne turaqty eko­nomıkalyq ósimdi qoldaýǵa jaǵdaı jasaıtyn bolady. Senatorlar «Balalardy den­saýlyǵy men damýyna zardabyn tıgizetin aqparattan qorǵaý týraly» zańdy qabyldady. Zań jobasynyń negizgi maqsaty bala­lardy zııandy aqparattan qor­ǵaýdy, balalardyń óz jasyna laıyq aqparatty alýǵa jáne taratýǵa quqyqtaryn iske asyrýdy, sondaı-aq, olardyń aqparat keńistigine jaǵymsyz aqparattyń enýinen qorǵaýdy qamtamasyz etý bolyp tabylady. Qujatta aqparat ónimderiniń saraptama júrgizý tetikteri bekitildi, sarapshylarǵa qoıylatyn talaptar, sarapshylar men saraptama uıymdaryn tirkeý tártibi belgilendi, osy sa­lany retteıtin memlekettik organ­dardyń quzyretteri ajyratyldy. Palata ilespe zań jobasyn eki oqylymda qaraǵannan keıin ony da qabyldady. Qoldanystaǵy zańnamanyń qu­qyqtyq olqylyqtaryn joıý, den­saýlyq saqtaý júıesin odan ári jetildirý, sondaı-aq, aza­mat­tardyń tolyqqandy medısı­nalyq qamtylýyna konstı­tý­sııa­lyq quqyqtaryn qamtamasyz etýdi kózdeıtin «Qazaqstan Respýb­lıkasynyń keıbir zańnamalyq akti­lerine densaýlyq saqtaý máse­le­leri boıynsha ózgerister men tolyq­tyrýlar engizý týraly» zań jo­basy birinshi oqylymda qaral­dy. Zań jobasy birqatar zańna­malyq aktilerge ózgerister men to­lyqtyrýlar engizýdi kózdeıdi. Depýtattar «Qazaqstan Res­pýblıkasynyń keıbir zań­na­malyq aktilerine zııatkerlik menshik salasyn quqyqtyq retteý máseleleri boıynsha ózgerister men to­lyq­tyrýlar engizý týraly» zań jobasyn ekinshi oqylymda qarap, reglamentke sáıkes túzetýlerimen Májiliske jiberdi. Asqar TURAPBAIULY, «Egemen Qazaqstan».