Tálimi erekshe mýltfılm

Joba óskeleń ur­paqtyń quqyqtyq mádenıetin qa­lyp­tastyrýǵa, káme­letke tol­maǵandar arasyndaǵy qu­qyq buzýshylyqtyń aldyn alýǵa jáne «Zań men tártip» qaǵıdasyn nasıhattaýǵa baǵyttalǵan. Sondaı-aq uıymdastyrýshylar mýltfılmniń maqsaty – balalarǵa zań men ádildiktiń, qoǵamdyq tártiptiń mańyz­dylyǵyn jeńil tilmen ári qyzy­ǵatyndaı etip túsindirip berý ekenin jetkizdi.

Anımasııalyq fılmdegi basty keıipker – eldiń táýelsizdigi men kúsh-qýatyn beıneleıtin Barys ańy. Ol sıýjet barysynda balalarǵa adaldyq pen qurmettiń, erejelerdi saqtaýdyń ne ekenin úıretip, táptishtep túsindiredi.

Is-shara balalarǵa merekelik kóńil kúı syılady. Oqýshylar fılm tamashalaýmen qatar, jol qozǵalysy erejeleri boıynsha suraq-jaýapqa qatysyp, kınolog, krımınalıst jáne arnaıy jasaq qyzmetiniń jumystarymen jaqynyraq tanysty. Sondaı-aq polısııanyń qıyn da jaýapty qyzmetinen syr shertken fotokórmege qatysty. Merekelik is-sharada qýyrshaq teatry, Shymkent sırki ártisteri, jol qozǵalysynyń jas ınspektorlary sahnalyq qoıylymdar qoıdy. Onyń sońy ónerpazdar uıymdastyrǵan qyzyqty konsertke ulasty. Ssenarıı bo­ıyn­sha izgi nıettiń belgisi re­tinde áýege túrli-tústi sharlar ushyryldy.

О́z kezeginde joba avtorlary «BalaZan» – tek mýltfılm ǵana emes, balalarǵa zań men ádildikti, eń baǵaly qasıet ózara qurmetteýdi úıretetin mańyzdy tárbıelik bastama ekenin aıtty.

«Prezıdent Qasym-Jomart Toqaevtyń bastamasymen elimizde «Zań men tártip» qaǵıdasy júzege asyrylyp jatyr. Ol birinshi kezekte memlekette qoǵamdyq tártipti saqtaýdy kózdeıdi. О́skeleń urpaq jastaıynan zańdy syılap ósse, keıin eseıgende tártip buzbaıtyn bolady. Is-shara arqyly osy ıdeıamyzdy jetkizgimiz keldi. Balany jastaıynan jaýapkershilikti sezindirip tárbıelesek, ondaı ul-qyzdan erteńgi kúni óte uqypty, adal da tártipti azamat ósip shyǵady. Balalardyń da óz ortasy bolady. Ol jerde de tártip buzylýy múmkin. Býllıng deıtin jaman áreket qadaǵalaýdyń, durys tárbıeniń bolmaýynan týyndaıdy. Osyndaı teris qylyqtyń aldyn alý úshin de qalalyq ákim­dikpen birlesip tárbıelik máni zor anımasııalyq fılm túsirdik. Mýltfılm arqyly úlken kisilerdi syılaýǵa, ózinen kishige qamqorlyq kórsetýge úıretýdi maqsat tuttyq. Búginde álemde jahandaný úderisi júrip jatyr. Sonyń saldarynan má­denıet, shekara ataýlary joıylyp barady. Bul qubylystyń áserinen adamdar meılinshe erkin, eshqandaı yrym- tyıymǵa baǵynbaı ómir súrýge talpyna bastady. Onyń bir jaman jeri – dástúr men tárbıege keri áserin tıgizedi. Ásirese jahandanýdyń qurbandyǵyna birinshi jastar iligedi. Sol úshin olardy teris qylyq, jaman minezden saqtaý – barshamyzdyń paryzymyz. Osylaısha, qalalyq polısııa jergilikti atqarýshy bılikpen tize qosyp, osyndaı tárbıelik baǵyttaǵy bastamalardy qolǵa alyp jatyr. Onyń nátıjesi jaman bolmaıdy degen úmittemiz. Bala kúnde berilgen tárbıe, taǵylymdy bilim adamnyń bo­ıynan eshqashan joǵalyp ketpeıdi. Osy maqsatqa oraı baldyrǵandardyń bolashaqta naǵyz zııaly azamat bolyp qalyptasýyna qazirden bastap kirisip jatyrmyz. Bas keıipkeri barys bolyp balalardy durys tárbıege baýlıtyn anımasııalyq fılm jobasy osy aıtylǵan sózderimizdiń basty aıǵaǵy», dedi Shymkent qalalyq polısııa departamenti bastyǵynyń orynbasary Ulyqbek Myltyqov.

Mamannyń málimdeýinshe, «Zań men tártip» qaǵıdasyn iske asyrý baǵytynda búgingi tańda departament qyzmetkerleri úlken jumys atqaryp otyr. Sonyń ishinde balalar men jasóspirimder arasynda bolatyn qylmystyń aldyn alý men olardy túrli quqyq buzýshylyqtan saqtaý úshin mektepter men arnaýly oqý oryndarynda mańyzdy kezdesýler men túsindirý jumystary júrgizilip keledi. Sol basqosýlarda tártip saqshylary oqýshylar men stýdentterge qoǵamdyq tártipti saqtaýdyń mańyzdylyǵy jóninde, jaman ádet-qylyqtardyń jeke adamnyń ómirine, onyń otbasyna jáne memleketke tıgizer qandaı keri áseri baryn aıtyp túsindiredi. Departament mamandarynyń habarlaýynsha, jas balalarǵa arnalǵan anımasııalyq fılm jobasy aldaǵy ýaqytta da jalǵasyn tabady.

ShYMKENT