Qazaqstannyń iri bankteri ártúrli strategııa arqyly kiris kózin arttyryp, óz orny men básekelestik artyqshylyǵyn saqtap keledi. Biri korporatıvtik klıentterge qyzmet kórsetýge basymdyq berse, endi biri sıfrlyq ekojúıe men fıntehke ınvestısııa salady, dep habarlaıdy Egemen.kz.
Halyk Bank kirisiniń negizgi bóligin korporatıvtik kredıtterden alady – bul jalpy tabystyń shamamen 40%-yn quraıdy. Bólshek nesıeler men tranzaksııalyq qyzmetter 35%-ǵa deıin úles qossa, 25%-y komıssııalar men qosymsha banktik qyzmetterden túsken. Bank úshin basty draıver – iri klıentter jáne áleýmettik jobalarǵa qatysý. Osy baǵyttar arqyly Halyk Bank turaqtylyqty saqtap, qaryz naryǵynda senimdi pozısııaǵa ıe bolyp otyr.
Kaspi Bank erekshe tásilge súıenedi: kiristiń jartysy marketpleıs pen tólem servısinen túsedi. Tutynýshylyq kredıtter – 30%, al qosymsha qyzmetter – BNPL, jarnama jáne basqa servıster – 20%. Bul model banktiń sıfrlyq ekojúıesi men úlken klıenttik bazasynan turaqty kiris ákeletinin kórsetedi. Kaspi Bank osylaısha qarjy men tehnologııany ushtastyryp otyr.
Al, Bank SentrKredıt kirisin kóbinese korporatıvtik kredıtterden (45%) alady. Ipoteka jáne bólshek nesıeler 35% úles qossa, komıssııalar men qyzmet kórsetý 20%-dy quraıdy. Bul bank úshin turaqty, senimdi model bolyp tabylady. Degenmen, Kaspi nemese Halyk Bank sııaqty «jyldam ósý» draıverleri joq, ol naryqta klassıkalyq, boljamdy strategııamen jumys isteıdi.
ForteBank kirisiniń jartysyn shaǵyn jáne orta bızneske beriletin nesıelerden alady. Kalkýlıasııalyq jáne kassalyq qyzmetter – 30%, al bólshek nesıe – 20%. ForteBank jyldam sheshim qabyldaýdy jáne jeke klıentpen jumys isteýdi basty nazarda ustaıdy.
Freedom Bank qazirgi tańda tabysqa emes, ósýge ınvestısııa salýǵa basymdyq beredi. Bank ekojúıesin qurý arqyly uzaq merzimdi perspektıvada kiris kózin qalyptastyrýdy kózdeıdi.