Memleket basshysy Qasym-Jomart Toqaev «Rossııskaıa gazeta» basylymyna jarııalaǵan «Máńgilik dostyq – halyqtarymyz úshin jarqyn jol» atty maqalasynda eki el arasyndaǵy transporttyq-logıstıkalyq salanyń mańyzdylyǵyna toqtalady, dep jazady Egemen.kz.
Búginde elimizdiń aýmaǵy arqyly 13 halyqaralyq transport dálizi ótip jatyr. Onyń beseýi temirjol jelisi bolsa, segizi – avtomobıl joly, sáıkesinshe osy joldar Azııa men Eýropa arasyndaǵy qurlyqtaǵy júk tasymalynyń 85 paıyzyn qamtamasyz etip tur.
«Qazaqstan men Reseıdiń aýmaǵy men geografııalyq ornalasýyn eskere otyryp, tranzıttik baǵyttardy jáne tıisti ınfraqurylymdy odan ári damytý búkil Eýrazııa keńistiginiń turaqty kólik baılanysyn qamtamasyz etýde aıryqsha mańyzdy ról atqarady. Osy maqsatqa jetý úshin bizdiń elder «Batys Eýropa – Batys Qytaı» avtomobıl dálizindegi ótkizý qabiletin joǵarylatý boıynsha jumys istep jatyr. Qazaqstan men Reseı shekarasyndaǵy 30 avtomobıl ótkizý beketin modernızasııalaý júzege asyrylýda.
Biz «Soltústik – Ońtústik» kólik dáliziniń shyǵys baǵytyn keńeıtý baǵytynda birlesip jumys istep kelemiz. Qazirgi ýaqytta bul baǵyttaǵy júk tasymaly kólemi aıtarlyqtaı ósip otyr. Bul úderiste Reseı – Qazaqstan – Túrikmenstan – Iran temirjolynyń mańyzy erekshe. Osy strategııalyq baǵyttyń ótkizý qabiletin aldaǵy bes jyl ishinde jylyna 20 mıllıon tonnaǵa deıin arttyrýdy kózdeıtin jol kartasyna qol qoıyldy», dep jazady Prezıdent.
Memleket basshysynyń aıtýynsha, atalǵan baǵyttar bizdiń yntymaqtastyǵymyzda mańyzdy oryn alady, alaıda elder arasyndaǵy ózara is-qımyl aýqymy mugymen shektelmeıdi, ıaǵnı múmkin bolǵan barlyq salany qamtıdy.