14 jeltoqsannan bastap Almaty men Tashkent arasyndaǵy halyqaralyq poıyz kúndelikti qatynaıdy. Jańa keste arqyly kún saıyn 400-den astam jolaýshy tasymaldanady, al bılet baǵasy sanatyna baılanysty ózgeredi, dep habarlaıdy Egemen.kz.
«Jolaýshylar tasymaly» AQ habarlaýynsha, Baǵyt boıynsha jolaýshylarǵa jaılylyǵy joǵary «Talgo» poıyzdary qyzmet kórsetedi. Bılet baǵasy: otyratyn oryn – 10 167 teńge, kýpe – 20 711 teńge, lıýks – 30 772 teńge.«Kúndelikti qatynaý kestesi jolaýshylarǵa saparlaryn yńǵaıly josparlaýǵa múmkindik beredi. Jańa keste Almaty men Tashkent arasyndaǵy kólik qatynasyn nyǵaıtyp, týrıstik aǵyndy damytýǵa jáne eki el arasyndaǵy mádenı, iskerlik baılanystardy kúsheıtýge baǵyttalǵan», delingen habarlamada.
Aldaǵy qysqy maýsymǵa baılanysty keıbir baǵyttarda poıyz qozǵalysy kestesine ózgerister engizilýi múmkin. Qozǵalys týraly tolyq aqparatty onlaın-kesteden qaraýǵa bolady.