Úkimet basshysy Oljas Bektenov Densaýlyq saqtaý mınıstrligi Sıfrlandyrý mınıstrligimen birlesip, densaýlyq saqtaý júıesine dári-dármek pen medısınalyq buıymdardy josparlaý, taǵaıyndaý jáne satyp alý rásimderine qatysty jasandy ıntellektini engizý sharalaryn qabyldaýdy tapsyrdy, dep habarlaıdy Egemen.kz Úkimettiń baspasóz qyzmetine silteme jasap.
Sonymen qatar halyq tarapynan kelip túsetin aryz-shaǵymdarǵa jedel jaýap berý qajet ekenin atap ótti.
Densaýlyq saqtaý mınıstrligine Mádenıet jáne aqparat mınıstrligimen, ákimdiktermen birlesip, dárilik zattarmen qamtamasyz etý týraly halyqpen turaqty negizde keń aýqymdy aqparattyq-túsindirý jumystaryn júrgizý tapsyryldy. Buqaralyq aqparat quraldaryn, sıfrlyq platformalar men áleýmettik jelilerdi jáne óńirlik is-sharalardy barynsha paıdalaný kerek.
«Bizdiń mindetimiz – densaýlyq saqtaý salasyn barynsha ashyq, ádiletti jáne eń bastysy, árbir azamat úshin qoljetimdi etý», dep qorytyndylady sózin Premer-mınıstr Oljas Bektenov. Úılestirý men baqylaý Premer-mınıstrdiń orynbasary Qanat Bozymbaevqa júkteldi.