27 qarashada ótetin Bishkektegi sammıtte Ujymdyq qaýipsizdik sharty uıymyndaǵy (UQShU) tóraǵalyq Qyrǵyz Respýblıkasynan Reseı Federasııasyna ótedi, dep habarlaıdy Egemen.kz Kabar-ǵa silteme jasap.
«Qazirgi geosaıası jaǵdaıda ótetin bul sammıt óńirlik turaqtylyqty saqtaý, terrorızm men ekstremızm kórinisteriniń aldyn alý baǵytyndaǵy ózara is-qımyldy jetildirýge arnalmaq. UQShU hatshylyǵynda halyqaralyq jáne óńirlik qaýipsizdikke qatysty ózekti máselelerdiń keń aýqymy talqylanyp, uıymnyń sessııaaralyq kezeńdegi qyzmetiniń negizgi qorytyndylary shyǵarylady», delingen habarlamada.
Sonymen qatar, Reseı tarapy aldaǵy kezeńge arnalǵan óz basymdyqtaryn usynbaq.
Bekitilgen rotasııa tártibine sáıkes, Qyrǵyzstan memleket basshylarynyń qaraýyna UQShU bas hatshysy laýazymyna óz kandıdatyn usynady.
Hatshylyqtyń habarlaýynsha, memleket basshylarynyń qaraýyna ujymdyq qaýipsizdikti nyǵaıtýdyń túrli aspektilerin qamtıtyn aýqymdy qujattar paketi engiziledi.
Sammıt qorytyndysy boıynsha álemdegi jáne UQShU jaýapkershilik aımaǵyndaǵy jaǵdaıǵa baǵa berip, óńirlik beıbitshilik pen turaqtylyqty nyǵaıtýǵa qatysty ustanymdardy qamtıtyn Ujymdyq qaýipsizdik keńesiniń deklarasııasy qabyldanady dep josparlanyp jatyr.