Ulttyq testileý ortalyǵynyń dırektory Abdrasılov Bolatbek Serikbaıuly 5-8 qarasha aralyǵynda Nıderland Koroldiginiń Gaaga qalasynda ótken bilim berýdegi baǵalaýdyń Eýropalyq qaýymdastyǵynyń (AEA-Europe) 26-shy jyl saıynǵy konferensııasyna qatysty, dep habarlaıdy Egemen.kz.
AEA-Europe – baǵalaý agenttikterin, mınıstrlikterdi, ýnıversıtetter men ǵylymı-zertteý ınstıtýttaryn biriktiretin halyqaralyq kásibı qaýymdastyq. Bıylǵy konferensııa «Baǵalaýdyń damýy jáne onyń bilim berýge yqpaly» taqyrybyna arnalǵan. Is-sharaǵa 43 elden 400-den astam jetekshi sarapshylar men ǵalymdar qatysty.
Konferensııa barysynda dırektor Qazaqstandaǵy bilim berý salasyndaǵy baǵalaý júıesiniń damýy, Ulttyq testileý ortalyǵynyń qyzmeti men psıhometrıka baǵytyndaǵy ǵylymı zertteýlerdiń jetistikteri týraly baıandama jasady. Sondaı-aq, qatysýshylarǵa Ulttyq biryńǵaı testileý (UBT) tapsyrmalarynyń senimdiligi men valıdtiligin arttyrýǵa baǵyttalǵan ǵylymı tásilder tanystyryldy.
Baıandamanyń mańyzdy bóligi Educational Testing Service (ETS) kompanııasymen júzege asyrylyp jatqan halyqaralyq áriptestikke arnaldy. Jýyrda QR Ǵylym jáne joǵary bilim mınıstri Saıasat Nurbek pen ETS kompanııasy ózara túsinistik týraly Memorandýmǵa qol qoıǵan bolatyn. Qujat aıasynda aldaǵy úsh jylda UBT testilerin jetildirý jáne halyqaralyq standarttarǵa sáıkestendirý baǵytynda birlesken jumystar júrgiziledi. Konferensııa qatysýshylary bul bastamany joǵary baǵalap, qazaqstandyq tájirıbege aıryqsha qyzyǵýshylyq tanytty.
Cito, AQA jáne basqa da jetekshi baǵalaý uıymdarynyń basshylarymen ǵylymı yntymaqtastyq jáne birlesken zertteýler júrgizý máseleleri talqylandy. Sonymen qatar, AEA-Europe prezıdenti, professor Demıan Mıorchanmen mazmundy kezdesý ótti. Kezdesýde ETS-pen birlesken jobanyń nátıjelerin aldaǵy konferensııalardyń birinde jeke sımpozıým túrinde usyný múmkindigi qarastyryldy.
Is-shara sońynda UTO dırektory B. Abdrasılov halyqaralyq arenada UBT-nyń jańa formattaǵy testileý júıesin zertteýdiń ǵylymı nátıjelerin belsendi túrde ilgeriletý UBT-ny halyqaralyq taný úshin de, onyń zamanaýı jáne tehnologııalyq baǵalaý quraly retinde qalyptasýyna da yqpal etetinin atap ótti.