Qazaqstanda qazan aıynda jańa turǵyn úılerdiń baǵasy orta eseppen 1 paıyzǵa qymbattady. Alaıda ósim barlyq óńirde birdeı emes, tek bes qalada kóterilip, keıbir aımaqtarda kerisinshe tómendegen, dep habarlaıdy Egemen.kz.
Ulttyq statıstıka bıýrosynyń derekterine súıensek, qazan aıynda jańa páterlerdiń ortasha baǵasy qyrkúıekpen salystyrǵanda 1%-ǵa ósti. Baǵanyń aıtarlyqtaı qymbattaýy birneshe qalada ǵana baıqalǵan.
Eń joǵary ósim Konaev qalasynda tirkeldi – bir aıda baǵa 5%-ǵa artqan. Almatyda kórsetkish – +2,9%, Aqtaýda – +1,9% deńgeıinde. Sondaı-aq, Shymkent pen Semeıde de azdaǵan ósim bar – 0,5-0,6%.
Al Atyraýda, Pavlodarda jáne Kókshetaýda 0.1-0.6%-ǵa tómendegen. Qalǵan óńirlerde jańa úılerdiń quny ózgerissiz qaldy.
Qazan aıynyń qorytyndysy boıynsha eń qymbat jańa baspana kelesi qalalarda satylyp jatyr:
Almaty – 667 027 tg/kv. m; Astana – 650 133tg/kv. m; Atyraý – 521 361tg/kv. m; Shymkent – 518 345tg/kv. m; Semeı – 467 745tg/kv. m.Eń arzan jańa úıler Oralda – munda bir sharshy metrdiń baǵasy 299 155 teńge, bul Almatydaǵy kórsetkishten shamamen 2,2 ese arzan.
El boıynsha bir sharshy metrdiń ortasha baǵasy – 555 161 teńge. Bul qyrkúıektegi kórsetkishten shamamen 5,8 myń teńgege joǵary.
Jyldyq dınamıka da oń baǵytta: sońǵy bir jylda jańa úıler 13,1%-ǵa qymbattaǵan. Eń joǵary ósim Pavlodarda (+24,2%), Konaevta (+17,8%) jáne Almatyda (+16,2%) baıqalǵan. Sonymen qatar Astanada baǵa 13,7%-ǵa, al Shymkentte 15,5%-ǵa artqan.