Qyzylorda oblystyq tarıhı-ólketaný mýzeıinde orta ǵasyr órkenıetiniń qazyǵy sanalatyn Otyrardan tabylǵan tarıhı muralar kórmesi ashyldy. «Uly Jibek joly boıyndaǵy Otyrar: ǵylym men órkenıettiń sabaqtastyǵy» atty bul sharanyń ereksheligi – Otyrar memlekettik arheologııalyq mýzeı-qoryǵynda jınaqtalǵan jádigerler jurtshylyqqa usynyldy.
Ashylý saltanatynda Qyzylorda oblystyq tarıhı-ólketaný mýzeıiniń dırektory Sapar Kózeıbaev otyrarlyq áriptesterine alǵys aıtyp, kórme jumysyna sáttilik tiledi. Otyrar memlekettik arheologııalyq mýzeı-qoryǵynyń bas qor saqtaýshysy Nursultan Bekeshev mundaǵy jádigerler kóne qalanyń dúnıejúzilik órkenıetke qosqan úlesiniń dáleli ekenin atap ótti.
Kórme barysynda Otyrar órkenıeti, qalanyń órkendeýine Uly Jibek joly men Islam dininiń áseri týraly aıtyldy. Ár dáýir jylnamashylary gúldengen shahar dep baǵa bergen baıyrǵy qonystaǵy qalalyq mádenıet, eginshilik, saýda, óndiriske qatysty zattar qoıylǵan kórmede sonaý XIII ǵasyrdan qalǵan maqta, bıdaı qaldyqtary, XIV ǵasyr murasy sanalatyn temir ketpen el nazaryn erekshe aýdarady.
Otyrardyń ǵylym men mádenıet, óndiris pen saýdany qatar damytqan úlken ortalyq bolǵanyn aıǵaqtaı túsetin syrly, órnekti qaptamalar, shyńyltyrly ydystar, keramıkalyq jáne shyny buıymdar, áshekeıler, mys teńgeler tarıhı tanymdy keńeıtetin qundy jádiger bolyp otyr.
Qyzylorda