Kishkentaı kórermen úshin tamasha jańalyq! Memlekettik qýyrshaq teatry 13 qarasha kúni Berdibek Soqpaqbaevtyń áıgili «Meniń atym – Qoja» shyǵarmasyn alǵash ret qýyrshaq beınesinde sahnalap, kópshilik nazaryna usynady. Qoıylym rejısseri – Erkebulan Qabdyl.
Qazaq balalar ádebıetiniń altyn qorynan oıyp oryn alǵan klassıkalyq týyndy – ult rýhanııatynyń máńgilik qundylyqtaryn dáripteıtin shyǵarmalardyń biri. Al Qoja beınesiniń sahna tórinen qýyrshaq tilinde jańasha sıpatta ún qatýy – kishkentaı kórermen úshin úlken óner oqıǵasy bolary anyq.
Qoıylymnyń rejısseri Erkebulan Qabdyl qoltańbasynan shyǵarmanyń basty ıdeıasy balalyqtyń shynaıy álemin, ójettigi men ańǵal tazalyǵyn saqtaı otyryp, qazirgi zaman balasyna túsinikti ári tartymdy túrde jetkizýdi maqsat etken shyǵarmashylyq erkindikti ańǵardyq. Al ınssenırovka avtory Damır Amantaı kórermenge ádebıet pen teatrdyń túıisken tusynda jańa kórkemdik sheshim usynypty. Onyń dramatýrgııalyq nusqasy Qojanyń ishki jan dúnıesin, arman-qııalyn hám ómirge degen kózqarasyn qýyrshaq teatrynyń poetıkasyna saı sheber úılestirip, shyǵarmanyń rýhyn tereń ashady.
Qoıylymnyń beınelik álemin qalyptastyrǵan sýretshi Iýlııa Chernova balalarǵa tanys aýyl tirshiligi men mektep ómirin, Qojanyń erkin minezin beıneleıtin sahnalyq keńistik pen qýyrshaq keıipkerlerdi kórkem sheshimmen shynaıy usyna bilipti. Qoıylym kompozıtory Nursultan Tóreálıdiń áserli áýenderi oqıǵa jelisin sezimmen órip, Qojanyń kóńil kúıin áýez arqyly utymdy jetkizedi. Al qoıylymnyń bı qımyldaryn tartymdy úılestire bilgen baletmeıster Rınat Bılıbaev sahna yrǵaǵyna jumyrlyq ústep, kórinisterge serpin men oıyndyq sıpat syılaı alǵan.
«Biz úshin Berdibek Soqpaqbaevtyń shyǵarmasyn qýyrshaq teatry sahnasyna shyǵarý – úlken jaýapkershilik. Bul týyndy ár býynnyń júregine jol tapqan. Endi sol rýhanı murany qýyrshaq óneri arqyly jańǵyrtyp, jas kórermenge jetkizý – bizdiń basty maqsatymyz», dedi Memlekettik qýyrshaq teatrynyń dırektory Almat Amangeldi.
Jaqynda mereıli 90-maýsymynyń shymyldyǵyn ashqan teatrdyń kezekti premerasy – ádebı murany zamanaýı sahna óneri arqyly nasıhattaýdyń biregeı úlgisi. Kórermen Qojanyń kúlki men qaıshylyqqa toly balalyq álemine enip, onyń oı-sanasynyń qalyptasý jolyna kýá bolady. Qoıylym tek balalarǵa ǵana emes, ata-analarǵa da áserli týyndy bolady dep kútilýde. О́ıtkeni árbir eresek kórermen óz balalyq shaǵyn, alǵash jasaǵan qatelikter men arman-qııalyn Qojanyń beınesinen qaıta tabary sózsiz.