10 jeltoqsannan bastap Aýstralııa álemde alǵash bolyp áleýmettik jelilerge jas shekteýin engizedi. Endi 16 jasqa tolmaǵan aýstralııalyqtar «Facebook», «Instagram», «TikTok», «Snapchat», «YouTube», «X», «Threads», «Reddit», «Kick» platformalaryna kire almaıdy.
Kompanııalar osy kúnnen bastap kámeletke tolmaǵan barlyq akkaýntyn tolyqtaı óshirýge mindetti. Talap oryndalmasa, 49,5 mıllıon aýstralııa dollaryna deıin aıyppul salynady. Áleýmettik jelilerdiń jumysyn baqylaý jáne erejeniń oryndalýyn qadaǵalaý elektrondyq qaýipsizdik komıssaryna júktelgen. Komıssar atalǵan platformalardy resmı túrde «jas shekteýli qyzmetter tizimine» engizgenin habarlady.