Kelesi jyly Aqtóbe oblysyndaǵy Qarǵaly sý qoımasyna kúrdeli jóndeý bastalady. Osyǵan baılanysty Sý resýrstary jáne ırrıgasııa mınıstrliginiń Sý sharýashylyǵy komıteti men «Qazsýshar» RMK Aqtóbe fılıaly mamandary qaıta jaraqtandyrý jumystarynyń jobalaý-smetalyq qujattaryn ázirleýdi bastady, dep habarlaıdy Egemen.kz Aqtóbe oblysy ákiminiń baspasóz qyzmetine silteme jasaı otyryp.
Bul týraly Sý resýrstary jáne ırrıgasııa mınıstri Nurjan Nurjigitovtyń «Qazsýshar» RMK Aqtóbe fılıalynyń bıyl atqarǵan esebin tyńdaý kezinde belgili boldy. Qarǵaly ózeni men erigen qar sýymen tolyǵyp, 280 mln tekshemetr sý syıatyn Qarǵaly sý qoımasy 1975 jyly paıdalanýǵa berilgen. Negizinen Aqtóbe qalasyndaǵy óndiristik kásiporyndardy, qala irgesindegi orman sharýashylyǵy mekemesi men baý-baqsha ujymdaryn sýmen jabdyqtaý úshin turǵyzylǵan gıdrotehnıkalyq nysanǵa 50 jyldan beri kúrdeli jóndeý júrgizilmepti.
«Qaıta jaraqtandyrý jumystary barysynda sý qoımasynyń barlyq qondyrǵysy men jabdyqtary almastyrylady. Sonymen qatar gıdrotehnıkalyq nysandy qýat kózderimen jabdyqtaý úshin aınalasyna shaǵyn sý elektr stansasy ornatylady. Odan artylǵan elektr qýaty jaqyn mańdaǵy kásipkerlik nysandary men eldimekenderge baǵyttalady. О́ńirimizdegi sý qoımalaryn qaıta jańǵyrtý jumystary sońǵy jyldary kezeń-kezeńimen iske asyryla bastady. Byltyr Elek ózeni boıyndaǵy Aqtóbe sý qoımasy kúrdeli jóndeýden ótti. Onyń 36 jyldan beri kidirissiz jumys istep turǵan, biraq eskirgen qondyrǵylary, shlıýzderi qaıta salyndy. Sondaı-aq Sazdy sý qoımasynda da kúrdeli jóndeý jumystary aıaqtalýǵa jaqyn. Jobalaý-smetalyq qujattarynyń memlekettik saraptamadan ótkenin kútpeı-aq, Qarǵaly sý qoımasynyń aınalasyn abattandyrýdy bastap kettik. Qazirgi ýaqytta kireberis jol tegistelip, beton quıylyp jaryq shamdary aýystyrylyp, beınekameralar ornatylyp jatyr. Osy sharýany qarasha aıynyń sońyna deıin aıaqtaımyz», deıdi «Qazsýshar» RMK Aqtóbe fılıalynyń dırektory Rınat Sháýenov.
Aqtóbe oblysy