Júzdegen jas mamanǵa járdem berip, jol bastaýshy bolǵan «Dıplommen – aýylǵa» baǵdarlamasyna júginýshiler jyl saıyn kóbeıip keledi.
Jobaǵa aýyldar men aýdan ortalyqtaryna jumys isteýge kelgender qatysa alady. Nesıe qarajatyn úı satyp alýǵa nemese salýǵa paıdalanýǵa múmkindik bar. 2025 jyly nesıeniń eń joǵary somasy – 2 500 AEK nemese 9 830 000 teńge, merzimi – 15 jylǵa deıin.
Sonymen qatar aýyl turǵyndary kóterme járdemaqy ala alady. 2025 jyly birjolǵy tólem 100 AEK nemese 393 200 teńgege jetti. Ol úıdi jabdyqtaýǵa jáne alǵashqy qajetti zattardy satyp alýǵa arnalǵan. Baǵdarlamany qarjylandyrýdy memleket júzege asyrady.
Aıan О́tetileýov Qostanaı oblysy Beıimbet Maılın aýdanyna qarasty Baıshýaq aýylynda, sport salasynda eńbek etip júr. Aýyldyq jerde baspanasyz qıyn. Muny jas maman jaqsy túsindi. Sol úshin de eńbek etip, páter alýdyń qamyn burynnan oılap júrgen. Sport bapkerine «Otbasy bankiniń» aýyl jastaryn qoldaýǵa baǵyttalǵan «Dıplommen – aýylǵa» jobasy kómekke keldi.
«Jas kezimnen sport salasyna jaqyn boldym. О́rt sóndirýshi qyzmetinde júrsem de, tańdaýymdy ózgertýge sheshim qabyldadym. Sóıtip, Arqalyq qalasynda sport mamandyǵy boıynsha syrttaı bilim aldym. Áskerı sambo men grepplıngten birshama jetistikterim bar edi. Ýaqyt óte kele aýylǵa shaqyrtý alyp, ákimdik arqyly sport nusqaýshysy bolyp jumysqa ornalastym. Sol kezde baspana máselesin sheshýdiń naqty joly usynylyp, «Otbasy bank» arqyly úı alýǵa múmkindik týdy», deıdi Aıan Nurlybekuly.
«Dıplommen – aýylǵa» memlekettik baǵdarlamasyna aýyl turǵyndary, aýdan ortalyǵynyń mamandary ótinish bere alady. Aıan О́tetileýov te mamandardyń keńesimen Baspana Market (otbasybank.kz) sıfrlyq platformasy arqyly qujattaryn ótkizdi.
«Negizi, aýdan ákimdigi jyl saıyn óz óńirlerine qajetti mamandardyń tizimin jasaıdy. Úmitkerler aldymen ákimdikten suranysqa ıe mamandyqtar týraly aqparat alyp, keıin Baspana Market arqyly ótinish beredi dep estıtinmin. Buǵan meniń de qolym jetken soń, memlekettiń shynaıy kómegin sezindim. Úı alýda eshqandaı qıyndyq bolǵan joq. Barlyǵy júıeli túrde sheshildi», dep túsindirdi keıipkerimiz.
Baspanasyna qoly jetken maman bar ynta-jigerin jumysyna, shákirt tárbıeleýge arnamaq. «Qazir aýyldarda jumys isteıtin jastarǵa jaǵdaı jasalǵan. Endi bizdiń maqsatymyz – aýyl balalaryna sportty nasıhattap, salaýatty ómir saltyn qalyptastyrý. Bizge múmkindik molynan berilip otyr. Sony paıdalana bilsek, elimizdiń damýyna úles qosqanymyz», deıdi sport nusqaýshysy.
«Dıplommen – aýylǵa» – aýyldar men aýdan ortalyqtaryna jumys isteýge kelgen, aýyldyq jerdi tańdaǵan Aıan О́tetileýov sııaqty mamandarǵa turǵyn úı satyp alý úshin jeńildetilgen nesıe, sondaı-aq kóterme járdemaqy beretin qolaıly baǵdarlama. Tek baǵdarlamaǵa qatysý úshin buryn alynǵan nesıeler boıynsha merzimi ótken bereshektiń bolmaýy shart. Bankte atap ótkendeı, nesıe mólsherlemesi nebári 1%-ǵa teń bolsa, bastapqy jarna múldem talap etilmeıdi. Bıyl baǵdarlama ıgiligin kórgen 200 azamat baspanaly boldy.
2023 jyldan bastap baǵdarlamanyń operatory – «Otbasy banki». Azamattarǵa qolaıly bolý úshin ótinish berý júıesi tolyqtaı onlaın formatqa aýystyryldy. Nátıjesinde kelisim merzimi qysqaryp, qarjy bólý úderisiniń ashyqtyǵy artty. Sondaı-aq qatysýshylar ótinish mártebesin onlaın baqylap otyrady.