Astanada beıbit ýaqytta erlik pen janqııarlyq tanytqan polısııa qyzmetkerleri men Ulttyq ulannyń áskerı qyzmetshilerin ulyqtaýǵa arnalǵan «Qazirgi zaman qaharmany» respýblıkalyq aksııasy ótti, dep habarlaıdy Egemen.kz.
Is-sharaǵa qatysýshylar aldynda Ishki ister mınıstrliginiń jeke qurammen jumys jónindegi departamentiniń bastyǵy Oljas Myrzabekov, Astana qalalyq polısııa departamentiniń bastyǵy Marat Tólebaev jáne IIM Ulttyq ulany Bas qolbasshysynyń orynbasary Qaırat Úmbetov sóz sóıledi.
Ishki ister mınıstri Erjan Sadenov polısııa qyzmeti jaı ǵana jumys emes, bul ómirlik ustanym ekenin árdaıym atap ótedi. Bul qyzmet ózgeniń ómiri úshin óz ómirin táýekelge tigýge daıyn, beıbit kúnde de, qıyn sátte de erlik jasaı alatyn jandarǵa arnalǵan.
Saltanatty rásim barysynda elimizdiń ár óńirinen kelgen 16 zamanaýı qaharman – 15 polısııa qyzmetkeri men Ulttyq ulannyń bir áskerı qyzmetshisi marapattaldy.
Olardyń barlyǵy shynaıy batyldyq pen adaldyqtyń úlgisin kórsetken.
Marapattalǵandar arasynda polısııa aǵa leıtenanty Saǵyndyq Qurmantaev pen ádilet serjanty Rahat Baılın bar. Olar batyl áreketteriniń arqasynda 2025 jyldyń 23 naýryzynda Kókshetaýda qaıǵyly jaǵdaıdyń aldyn aldy.
Sol kúni polısııaǵa bes qabatty turǵyn úıde órt shyqqany týraly habarlama túsken. Alǵashqylardyń biri bolyp oqıǵa ornyna ýchaskelik ınspektor Saǵyndyq Qurmantaev pen Aqmola oblysy boıynsha QAJ departamentiniń qyzmetkeri Rahat Baılın jetti. Olar páter ishinde er adam men balanyń qalǵanyn bilip, esh oılanbastan esikti buzyp kirip, qoıý tútin basqan bólmeden segiz jastaǵy balany alyp shyqqan. Keıin qaıta kirip, es-tússiz jatqan er adamdy da qutqaryp qalǵan.
Barlyq qaharmandarǵa IIM atynan alǵys hattar men estelik syılyqtar tabys etildi. Sharaǵa ákimdik ókilderi, ishki ister organdarynyń ardagerleri, «Jas saqshy» polıseı synyptarynyń oqýshylary, sondaı-aq qyzmet babynda qaza tapqan qyzmetkerlerdiń jubaılary men analary qatysty.
Mınıstrdiń atynan qaza tapqan polıseılerdiń analary men jubaılaryna gúl shoqtary jáne estelik syılyqtar tabystaldy. Sondaı-aq jastardy otansúıgishtikke tárbıeleýge belsendi atsalysyp júrgen mektep dırektorlaryna alǵys hattar berildi.
«Qazirgi zaman qaharmany» aksııasy 2011 jyly Taraz qalasynda terrorısti ustaý kezinde qaza tapqan polısııa qyzmetkeri, Halyq qaharmany Ǵazız Baıtasovtyń erligin ulyqtaýǵa arnalǵan ıgi dástúrge aınaldy.