Tutynýshylar ustanymy aıqyn

«Tutynýshylardyń Ulttyq lıgasy» Respýblıkalyq qoǵamdyq birlestiginiń músheleri kezekten tys prezı­dent­tik saılaý ótkizý týraly Qazaqstan halqy Assam­bleıasy Keńesiniń bastamasyn qoldaıtynyn arnaıy uıymdastyrylǵan baspasóz máslıhatynda málim etti. Jýrnalıster aldynda oıymen ortaqtasqan «Tutynýshylardyń Ulttyq lıgasynyń» tóraıymy, Parlament Májilisiniń depýtaty Svetlana Romanovskaıa álemdegi ekonomıkalyq daǵdarys kezeńinde kez kelgen memlekettiń basty mindeti – halyqtyń tabys deńgeıin tómendetpeý jáne sonymen qatar, elimizdegi tutyný deńgeıin joǵaltpaý bolyp esepteledi deı kelip, al osy maqsattyń «Nurly Jol» baǵdarlamasy aıasynda sheshiletinine toqtaldy. Qazirgi kezeńde álemniń kóptegen memleketteri tap bolǵan ekono­mıkalyq daǵdarystardyń sharpýy elimizge áserin meılinshe azyraq tıgizýinde memleket ta­rapynan qolǵa alynǵan keshendi baǵdarlamanyń bereri moldyǵyn joǵary baǵalaǵan ol, osyndaı qıyn kezderden ótýde, qa­zaqstandyqtardyń ál-aýqatyn saqtaýda jáne elimizdiń tutas­tyǵyn nyǵaıtýda kezekten tys ótkizilýi talqylanyp jatqan prezıdenttik saılaýdyń qajettigine aıryqsha mán berdi. Aldymyzǵa qoıylǵan máse­lelerdi júzege asyrý úshin hal­qymyzdyń birigýi, azamattyq ustanymnyń kúsheıýi aýadaı qajet desek, biz kezekten tys prezıdenttik saılaý ótkizýdi ýaqtyly, der kezinde jasalǵan usynys dep sanaımyz. Bul ekonomıkalyq jáne geosaıası turaqsyzdyq ýaqytynda ulttyń rýhynyń nyǵaıýyna, azamattyq qoǵam áleýetiniń artýyna, pes­sımıstik kóńil kúılerdiń azaıýyna ákelip soǵatyny sózsiz, degen pikirin ortaǵa salǵan ­depýtat: «Saılaý – bul qoǵam kemel­diligin tekseretin emtıhan, sonymen qatar, syrtqy qaterlerge degen jaýap bolyp tabylady. «Molshylyqty aspannan su­ramaı, halyqtyń birligin sura!», – depti danyshpandar. Saı­laýdy ótkizýdi halyq suraýda, al halyq danalardyń danasy», dep Tutynýshylar lıgasy atynan barlyq azamattardy birigip, Qazaqstan halqy Assambleıasy Keńesiniń bastamasyn qoldaýǵa shaqyrdy. Anar TО́LEÝHANQYZY, «Egemen Qazaqstan».