Sıfrlyq tehnologııalardyń belsendi damýy jaǵdaıynda Internet jelisi arqyly memlekettik, qarjylyq jáne ózge de elektrondyq qyzmetterge azamattardyń qol jetkizý aýqymy kúnnen kúnge keńeıip jatyr, dep habarlaıdy Egemen.kz.
Alaıda, munymen qatar ınternet-alaıaqtyq salasyndaǵy qylmystardyń túrli ádis-tásilderi de qarqyndy damý ústinde.
Aalaıaqtar jyldam damyp kele jatqan jasandy ıntellekt múmkindikterin belsendi paıdalanyp, beıneler, aýdıojazbalar jáne adamdardyń bet-álpeti men daýysyn dál beretin keskinder jasaıdy.
Áleýmettik jelilerde zeınetaqy jınaqtaryn ár túrli oblıgasııalarǵa, aksııalarǵa jáne qarjylyq operasııalarǵa salý týraly shyndyqqa sáıkes kelmeıtin jarnamalary men usynystary bar rolıkter jıi taralyp jatyr.
Azamattardyń resmı qurylymdarǵa degen senimin paıdalana otyryp, alaıaqtar psıhologııalyq qysym kórsetip, jeke jáne qarjylyq aqparatqa qol jetkizý maqsatynda ózderin kóbinese memlekettik organdardyń, bankterdiń, quqyq qorǵaý organdarynyń, baılanys operatorlarynyń jáne basqa uıymdardyń, sonyń ishinde Biryńǵaı jınaqtaýshy zeınetaqy qorynyń qyzmetkerleri retinde tanystyrady.
Osyǵan baılanysty, «BJZQ» AQ zeınetaqy aktıvterin ınvestısııalaýmen Ulttyq bank aınalysatynyn eske salady. Ol Úkimet bekitken ınvestısııalyq deklarasııaǵa sáıkes zeınetaqy jınaqtaryn ár túrli qarjy quraldaryna salatyn senimdi basqarýshy retinde áreket etedi. Zeınetaqy aktıvterin basqarýǵa QRUB-tan basqa ınvestısııalyq portfeldi basqarýshylar (IPB) qatysa alady, olarǵa jınaqtardyń bir bóligin aýdarýǵa múmkindik bar. IPB-nyń basqarýyna aýdarýdy tek «BJZQ» AQ portaly arqyly jasaýǵa bolady, bul úshin eshqandaı deldal qajet emes.
Alaıaqtyq áreketterdiń aldyn alý maqsatynda jáne sizdiń qaýipsizdigińiz úshin «BJZQ» AQ tómendegilerdi eskertedi:
Zeınetaqy tólemderin rásimdeý úshin eshqandaı deldaldyń kómegi qajet emes, komıssııalyq tólem alynbaıdy; BJZQ qyzmet kórsetkeni úshin ótemaqy almaıdy, barlyq tólemder qatań túrde zań aıasynda júzege asyrylady; Jınaqtardyń bir bóligin turǵyn úıge nemese emdelý aqysyn tóleý maqsatynda paıdalaný tek ýákiletti operator (ekinshi deńgeıdegi bankter) arqyly júzege asyrylady; Memlekettik organdardyń, bankterdiń, quqyq qorǵaý qurylymdarynyń, baılanys operatorlarynyń jáne BJZQ-nyń qyzmetkerleri telefon, elektrondyq poshta nemese messendjerler arqyly derbes derekterdi, bank kartalarynyń derektemelerin, SMS-kodtardy jáne ózge de qupııa aqparatty eshqashan talap etpeıdi; Eger qońyraý shalýshy sizdiń aty-jónińizdi, turǵylyqty mekenjaıyńyzdy jáne jumys ornyńyzdy bilse, ol onyń resmı tulǵa ekendigin bildirmeıdi. Qajetti derekterdiń barlyǵyn túrli tásildermen alýǵa bolady. «BJZQ» AQ qyzmetkerleri óz jınaqtaryn aýdarý, qarjy quraldaryna salý, sondaı-aq qandaı da bir aksııalar satyp alý týraly usynystar jasalatyn túrli rolıkterge qatyspaıdy.BJZQ aqparatty resmı kózderden alýdy jáne tek zań sheńberinde áreket etýdi qatań eskertti.