Ábilhan Qasteev atyndaǵy memlekettik óner mýzeıiniń Ortalyq kórme zalynda Almatynyń ásem tabıǵatyn aıshyqtaǵan sýret kórmesi ashyldy, dep habarlaıdy Egemen.kz.
Qazaqstan Sýretshiler odaǵynyń músheleri Quralaı Amanjolova, Vıktorııa Soı, Svetlana Soı syndy talantty qylqalam sheberleriniń qoltańbalaryn biriktirgen "Almatydaǵy serýen" atty óner jármeńkesine 80-ge jýyq keskindemelik týyndylar qoıylǵan.
Sýretshiler plenerlik týyndylarynda Almaty qalasynyń sulý kelbetin beıneleı otyryp, kúndelikti ýaqyt tynysyn bir sát toqtatyp, qas-qaǵym sátti máńgilikke aınaldyrǵandaı áser qaldyrady. Sıýjettik kompozısııalardaǵy erekshe palıtra arqyly ýaqyt keńistiginiń dınamıkalyq yrǵaǵyn sezinýge jáne sol atmosferany erkin qabyldaýǵa múmkindik beredi. Ásirese, jaryq pen tústiń qatynasy arqyly sýretshiler qalanyń tańǵy sergektigin, túski qarbalasyn, keshki tynyshtyǵyn bir mezette kórsetip, kórermender sıýjetpen tikeleı baılanys ornata alatyndaı áser týǵyzǵan.
"Kórmeniń ereksheligi – ár avtordyń qalaǵa degen ózindik kózqarasy men sýretteý mánerin kórsete bilýinde. Sýretshilerdiń qylqalam izinen – qalanyń ótkeni men búgini, tabıǵaty men tylsym bolmysy, zaman aǵymyndaǵy halyqtyń ómir tirshiligi týraly áńgime órýge bolady. Qala kórinisteriniń astarynda adamdardyń rýhanı álemi, olardyń ómirge degen kózqarasy, tabıǵat pen qoǵam arasyndaǵy názik baılanys qylań beredi.
Negizinde plenerlik jumystardyń taǵy bir ereksheligi – olardyń shynaıylyǵy men energııasy. Munda árbir jumys – qalaǵa arnalǵan mahabbat haty, árbir boıaý – ýaqyttyń kýási",- deıdi ónertanýshy Gúlnar Jývanııazova.