Qazaq jastary ázirlegen «Aleem» atty aǵylshyn tilin úıretetin mobıldi qosymsha Qazaqstan «App Store» reıtınginde álemge áıgili «Duolingo»-ny basyp ozyp, birinshi orynǵa shyqty. Bul jetistikke joba eshqandaı ınvestısııasyz, jarnamasyz jáne shaǵyn komandamen ǵana qol jetkizgen.
«Aleem» – aǵylshyn tilin úırenýdi jeńil ári qyzyqty etýdi maqsat etken tolyqtaı tegin mobıldi qosymsha. Qosymshasynyń avtorlary – Alıdar Kúshikov pen Asyljan Altaı. Olar óz ónimin bar bolǵany eki kún buryn «App Store»-ǵa júktegen.
«Bizdiń maqsat – aǵylshyn tilin úırenýdi jeńil ári tıimdi etý. Osy oımen «Aleem» qosymshasyn jasadyq. Bul baǵdarlama arqyly árkim óz qyzyǵýshylyǵyna saı sabaqtardy tańdap, sóıleýdi, jazýdy damyta alady. Eń keremeti – paıdalanýshylarǵa barlyǵy tegin. Prezıdenttiń qoldaýy bizge úlken dem berdi. Iske qosylǵanyna eki-aq kún ótse de, «Aleem» «App Store»-dyń úzdik bes qosymshasy qataryna endi. Otandastarymyzǵa aǵylshyn tilin úırenýdiń qarapaıym, qyzyqty ári zamanaýı jolyn usynǵymyz keledi», deıdi joba avtory Asyljan Altaı.
Búginde «Aleem» elimizde ǵana emes, kórshiles memleketterde de keńinen tanylyp jatyr. Qosymsha Qyrǵyzstanda birinshi, Tájikstanda ekinshi, Túrikmenstanda altynshy, О́zbekstanda on birinshi, al Reseıde on ekinshi orynda tur.
Jasandy ıntellekt negizinde jasalǵan baǵdarlama qoldanýshynyń qyzyǵýshylyǵyna qaraı jeke sabaqtar usynady jáne sóıleý mashyǵyn jetildirýge basymdyq beredi. Joba avtorlarynyń aıtýynsha, endigi maqsat álemdik reıtıngte kósh bastaý. «Bul – tek bastamasy. Biz qazaq jastarynyń da álemdik deńgeıde ónim jasaı alatynyn dáleldegimiz keledi», deıdi avtor.