Ashhabad qalasynda Memleketaralyq sý sharýashylyǵyn úılestirý komıssııasynyń (MSShÚK) 91-otyrysy ótip, oǵan sala mınıstri Nurjan Nurjigitov,Túrikmenstannyń Sý sharýashylyǵy memlekettik komıtetiniń tóraǵasy Dýrdy Gendjıev, О́zbekstannan sala mınıstri Shavkat Hamraev,Tájikstannyń Energetıka jáne sý resýrstary birinshi orynbasary Djamshed Shodı Shoımzoda, baqylaýshy retinde Qyrǵyzstannyń Túrikmenstandaǵy Elshiliginiń keńesshisi Emıl Shadyhanov qatysty, dep habarlaıdy Egemen.kz.
Mınıstrliktiń málimetinshe, otyrysta taraptar 2025 jylǵy vegetasııa kezeńiniń qorytyndylaryn talqylady. Sondaı-aq 2025-2026 jyldardaǵy vegetasııaaralyq kezeńge arnalǵan Naryn-Syrdarııa sý qoımalary kaskadynyń boljamdyq jumys kestesi bekitildi. Osy kestege sáıkes Shardara sý qoımasyna keletin boljamdy sý kólemi kelisildi. Budan bólek, taraptar Araldy qutqarý halyqaralyq qorynyń negizin qalaýshy memleketter basshylarynyń sammıtterinde berilgen tapsyrmalardyń oryndalý barysy týraly esep berdi. Memleketaralyq sý sharýashylyǵyn úılestirý komıssııasynyń kelesi, 92-otyrysy kelesi jyly Tájikstanda ótedi.
Elimizdiń sý vedomstvosy basshysy Nurjan Nurjigitovtiń aıtýynsha, ótken sýarý maýsymy kúrdeli klımattyq jaǵdaıda ótti.
«Alaıda MSShÚK quramyndaǵy memleketterdiń ózara úılesimdi árekettesýi vegetasııa kezeńin turaqty ótkizýge múmkindik berdi. Osyndaı kezdesýler arqyly ortaq kelisimder jasalyp, aldaǵy yntymaqtastyqtyń negizi qalanady. Ortalyq Azııa elderindegi áriptesterimizben birge transshekaralyq sý resýrstaryn barlyq taraptyń múddesin eskere otyryp, ádil bólýge nıettimiz», dedi N.Nurjigitov.