Bul týraly Memleket basshysy Qasym-Jomart Toqaev Aýyl sharýashylyǵy eńbekkerleriniń ekinshi forýmynda aıtty, dep habarlaıdy Egemen.kz.
«Sý qoımalarynyń shamamen 60 paıyzy aýyl sharýashylyǵy enshisinde. Agrarlyq salada sýdy tıimdi paıdalaný, saıyp kelgende, eldegi búkil sý ekojúıesiniń turaqtylyǵyna áser etetin faktorǵa aınalyp otyr. Agrosektorda zamanaýı sý únemdeý tehnologııalary engizilip, sýdy kóp qajet etetin daqyldar alqaby azaıtylýda. Bul úlken jumystyń basy ǵana. Sarapshylardyń esebinshe, aldaǵy úsh jylda sý únemdeýshi tehnologııalar keminde bir mıllıon gektardy qamtıtyn deńgeıge jetedi», dedi Prezıdent.
Memleket basshysynyń aıtýynsha, sıfrlyq sheshimderdi engizý jáne jobalardy júzege asyrýdyń barlyq kezeńin qatań baqylaýǵa alý arqyly sý ınfraqurylymyn jańǵyrtýdy jedeldetken jón. Sý sharýashylyǵyn jańǵyrtý boıynsha jumys jetkilikti, alaıda bul aýyl sharýashylyǵy salasyn damytý josparymen ózara baılanysty bolýǵa tıis.
«Bizdiń vedomstvolar túrli josparlar men jol kartalaryn ázirleýmen áýestenip ketti. Tipti, onyń kóbi óz aralarynda kelisilmeıdi, júrdim-bardym jasalady. Mundaıdy doǵarý kerek. Memleket jumsaǵan ár tıynnyń qaıtarymy bolýǵa tıis. Bul daýsyz. Qarjyny zamanaýı sý paıdalaný tehnologııalaryn belsendi qoldanatyn óńirlerge berý qajet. Sondyqtan Aýyl sharýashylyǵy óndirisiniń óńirlik jospary Úkimet ázirlep jatqan Sý resýrstaryn basqarý jónindegi bas josparyna engizilýge tıis», dedi Qasym-Jomart Toqaev.