Agrosalaǵa bólinetin jeńildetilgen nesıe kólemi el tarıhynda alǵash ret 1 trıllıon teńgeden asyp, fermerlerge tehnıkany jańartý men qarjylandyrýdy qoljetimdi etý baǵytynda aýqymdy qadam jasaldy. Bul týraly Memleket basshysy Aýyl sharýashylyǵy eńbekkerleriniń ekinshi forýmynda aıtty, dep jazady Egemen.kz.
Nesıe qoljetimdiligin arttyrý úshin bankterge kepildik berý mehanızmi engizilgen. Nátıjesinde «Damý» qory bıyl 1300 nesıege kepildik berip, múlki jetkiliksiz shaǵyn jáne orta sharýalardyń qarjy alý máselesin sheshýge jol ashty.
«Nesıe qoljetimdi bolýy úshin bankterge quzyrly mekeme tarapynan kepildik berý tásili engizildi. Bıyl «Damý» qory 1300 nesıege kepildik berdi. Sóıtip nesıe alýǵa múlki jetkiliksiz kóptegen sharýanyń, ásirese, shaǵyn jáne orta deńgeıdegi fermerlerdiń máselesi oń sheshimin tapty», dedi Prezıdent.
Búginde sharýalar satyp alyp jatqan tehnıkanyń 90 paıyzy – Qazaqstanda qurastyrylǵan ónim. Eldegi 10 zaýytta álemge tanymal brendterdi qosa alǵanda, 19 túrli tehnıka shyǵarylady. Prezıdent jýyrdaǵy AQSh saparynda John Deere kompanııasymen quny 2,5 mıllıard dollar bolatyn strategııalyq seriktestik týraly kelisimge qol qoıǵanyn atap ótti. Kelisim aıasynda aldaǵy bes jylda Qazaqstanda 3 myńǵa jýyq zamanaýı tehnıka shyǵarylmaq.