Qaraǵandyda Balapan Ábenovti eske alýǵa arnalǵan shaǵyn fýtboldan oblystyq ashyq birinshilik 2018 jyldan beri ótkizilip keledi. Dástúrli dop dodasy fýtbolsúıer jas býynnyń basyn qosatyn alańǵa aınaldy. Bıyl týrnırdiń aýqymy keńeıdi. Alǵash ret týrnır respýblıkalyq deńgeıge ótip, 2012–2013 jyly týǵan jasóspirimder saıysqa tústi.
Aımaq-atyrapqa tanymal arys azamat Balapan Zıpatollaulynyń esimin el jadynda saqtaý maqsatynda dástúrli túrde ótkizilip kele jatqan týrnırde elimizdiń túkpir-túkpirinen kelgen komandalar ózara baq synasyp, úzdikterdi anyqtady.
Jarysqa qatysqan komandalar týrnır erejesine sáıkes eki sebetke bólindi. Ár sebet óz ishinde tórt komandadan toptastyryldy. Ár ujym toptyq kezeńde úsh oıyn ótkizdi. Nátıjesinde, toptyq syn qorytyndysynda joǵary upaı enshilegen eki komanda kelesi kezeńge, 1/16 fınalǵa joldama aldy. Budan keıin jarys pleı-off júıesimen jalǵasty. Jeńgen komanda kelesi kezeńge ótip, jeńilgenderi jarys jolynan shyǵyp qala berdi.
Eki kúnge sozylǵan tartysty dodada 1-oryndy elordalyqtar ıelendi. 2-oryndy «Jańaarqa – 2012» komandasy enshilese, qaraǵandylyq «Jas qyran» klýby úzdik úshtikti túıindedi. Munymen qosa, «Úzdik qaqpashy», «Úzdik shabýylshy», «Úzdik qorǵaýshy», «Úzdik oıynshy», «Kórermender kózaıymy» syndy atalymdarda úzdikter anyqtalyp, uıymdastyrýshylar tarapynan qarjylaı syılyqtarǵa ıe boldy.
Qaraǵandy oblysy