Fýtboldan 2026 jylǵy álem chempıonatyna irikteý kezeńiniń J toby aıasynda Qazaqstan quramasy óz alańynda Belgııamen 1:1 esebimen teń tústi, dep habarlaıdy Egemen.kz.
Oıyn «Astana Arena» stadıonynda ótti. Kezdesýdi Lıtva eliniń tóreshisi Donatas Rýmshas bastaǵan qazylar alqasy basqardy.
Alǵashqy mınýttardan-aq eki komanda da joǵary qarqyn kórsetip, qonaqtar dopty kóbirek baqylaǵanymen, esepti Qazaqstan ashty. 9-mınýtta Dastan Sátpaev joıqyn shabýyl jasap, aıyp alańyna enip, jaqyn buryshty dál nysanaǵa aldy — 1:0. Alǵashqy taımda Temirlan Anarbekov qaqpada senimdi oınap, birneshe qaýipti soqqyny qaıtara bildi.
Ekinshi taım bastalysymen-aq belgııalyqtar qysymdy údete tústi. 48-mınýtta Hans Vanaken jaqyn qashyqtyqtan baspen dál soqqy jasap, esepti teńestirdi. Odan keıin belgııalyq komanda birneshe shabýyl uıymdastyrdy, alaıda qazaqstandyq qaqpashy taǵy da erekshe sheberlik tanytty.
79-mınýtta Islam Chesnokov Jeremı Dokýǵa qarsy erejebuzýshylyq jasap, qyzyl qaǵaz aldy. Qalǵan mınýttardy Qazaqstan on oıynshymen ótkizdi. Soǵan qaramastan, alań ıeleri qorǵanysta jınaqy oınap, favorıt sanalatyn qarsylasqa qarsy teń nátıjeni saqtap qaldy.
Osylaısha, Qazaqstan quramasy irikteý kezeńin segiz upaımen aıaqtap, J tobynda tórtinshi orynǵa taban tireıdi.