AQSh Energetıka mınıstrligine qarasty Sandia zerthanasy 2025 jylǵy 19-21 tamyz aralyǵynda Nevada shtatyndaǵy Tonopa synaq polıgonynda ıadrolyq B61-12 bombasyn synaqtan ótkizgenin habarlady, dep jazady Egemen.kz.
Zerthana málimetinshe, bomba F-35 joıǵysh ushaǵynan tastalyp, barlyq ushý synaqtary tolyq sátti ótken. Bul synaqtar B61-12 túrlendirilgen bombasynyń qyzmet merzimin uzartý jónindegi kópjyldyq baǵdarlamanyń quramdas bóligi sanalady. Atalǵan baǵdarlama 2024 jyldyń sońynda aıaqtalyp, buıymnyń keminde 20 jyl qaýipsiz paıdalaný kepildigi bekitilgen.
Synaq aıasynda bombaǵa alǵash ret F-35 joıǵyshtarynda tasymaldaýǵa arnalǵan aldyn ala termııalyq daıyndyq júrgizilip, onyń naqty operasııalyq jáne ekologııalyq talaptarǵa sáıkestigi rastaldy.
Sandia mamany Djeffrı Boıdtyń aıtýynsha, bul ushý synaqtary jobanyń barlyq qatysýshylary júrgizgen kópjyldyq eńbektiń qorytyndysy bolyp otyr. Al polıgon basshysy Braıan Edkıns synaq barysyndaǵy joǵary deńgeıli úılestirý jumystary úsh nysandy da qaýipsiz baǵalaýǵa múmkindik bergenin atap ótti.
Sandia zerthanasynyń, Tonopa polıgonynyń jáne AQSh ÁÁK-niń birlesken jumysy F-35 ushaǵynyń dáldigi men senimdiligin túrli tapsyrmalardy oryndaý kezinde keshendi túrde baǵalaýǵa jol ashady. Synaq nátıjeleri ulttyq qaýipsizdikti arttyrýǵa baǵyttalǵan taldaýlarda paıdalanylmaq.