Qaraǵandyda tótenshe jaǵdaılar qyzmeti men polısııa birigip, 17-qabat terezesinen sekirmek bolǵan boıjetkenniń ómirin saqtap qaldy, dep habarlaıdy Egemen.kz.
Oqıǵa Respýblıka dańǵylyndaǵy kópqabatty úıde bolǵan. 2006 jyly týǵan qyz páterdiń 17-qabatyndaǵy tereze aldyndaǵy erneýde turǵan.
Habarlama túse sala TJM mamandary shuǵyl túrde úıdiń tóbesine kóterilgen.
Qutqarýshylar alpınıstik qural-jabdyq arqyly terezege syrtynan túsken, keıin qyzdy ishke qaraı qaýipsiz túrde tartyp alyp, oqıǵanyń aldyn aldy.
Qyz dereý jedel járdem brıgadasyna tapsyryldy. Qazir onyń jaǵdaıy dárigerlerdiń baqylaýynda.
Polısııa ókilderi qyzdyń ne sebepti mundaı áreketke barǵany anyqtalyp jatqanyn málimdedi.
Oqıǵa boıynsha barlyq qajetti shara júrgizilip jatyr.