«Qazgıdromet» málimetinshe, 17 qarashada Qazaqstan aýmaǵynyń basym bóliginde antısıklon yqpaly baıqalady. Bul kóbine ashyq ári jaýyn-shashynsyz aýa raıy bolatynyn bildiredi, dep habarlaıdy Egemen.kz.
Alaıda eldiń batysy, soltústik-batysy jáne soltústigi arqyly atmosferalyq fronttardyń ótýine baılanysty jańbyr men qar túrindegi jaýyn-shashyn, sondaı-aq kóktaıǵaq kútiledi. Soltústik-batysta burqasyn boljanady, bul jol boıynda qıyndyq týdyrýy múmkin.
Respýblıka boıynsha sınoptıkter tuman týraly eskertý jasady. Tuman ásirese, soltústikte, soltústik-batysta, shyǵysta jáne ońtústik-shyǵysta yqtımal. Sondaı-aq atalǵan aýmaqtarda jel kúsheıip, joǵary ekpinmen soǵýy múmkin.
Qazaqstannyń TJM júrgizýshiler men jaıaý júrginshilerge jolda saq bolýdy, jyldamdyqty jáne qashyqtyqty saqtaýdy, sondaı-aq sapardy josparlaý kezinde aýa raıy jaǵdaılaryn eskerýdi usynady. Tumany qalyń jáne kóktaıǵaq jıi bolatyn óńir turǵyndaryna uzaq saparlardan bas tartýǵa jáne qosymsha qaýipsizdik sharalaryn paıdalanýǵa keńes berildi.