Aýyl sharýashylyǵy eńbekkerleriniń ekinshi forýmynda Prezıdent Jarlyǵymen marapattalǵandardyń biri – «Novoselskoe» seriktestiginiń bas agronomy Fanıl Gabdýlhakov «Qazaqstannyń agrarlyq salasyna eńbek sińirgen qaıratker» ataǵyna ıe boldy.
О́ńirdegi aqyq dán aıalaǵan dıqan qaýym atbasarlyq agronom Fanıl Rıfkatovıchtyń esimin jaqsy biledi. Jerdiń tilin taba bilgen sharýashylyqtyń bas agronomy izdenimpazdyǵynyń, tyń ǵylymı jańalyqtardy oılap taba bilýiniń arqasynda yryzdyq molshylyǵyna úles qosyp keledi.
2011 jyly «Sochınskoe» jáne «Jaıdarman» dep atalatyn kúnbaǵystyń eki sortyna avtorlyq kýálik alǵan bolatyn. Sol jyly Aýyl sharýashylyǵy mınıstrliginiń sertıfıkatyna ıe bolyp, Qazaqstannyń «Úzdik agronomy» ataǵymen marapattaldy. Shyntýaıtynda, bul tabandy jumystyń nátıjesi edi. Ǵylymı jumysy týraly da, nátıjesi haqynda da aıta ketelik, 2003-2007 jyldary «Sochınskoe» tuqymy bes oblystaǵy egistik alqabynyń 70 paıyzyna sebildi. 2024 jyly 15 jylǵy ǵylymı jumystan keıin Fanıl Rıfkatovıch «Sochınskıı golozernyı» dep atalatyn arpanyń jańa túrin oılap shyǵardy.
Ár kezde tabıǵatpen tildesip, kúndelikti jumysty ǵylymmen ushtastyra bilgen bas agronom jańalyqty júzege asyrýynyń arqasynda seriktestiktiń básekelestik aıdynynda jalaýy jelbireýine mol úlesin qosty. Osy eńbegi úshin 2008 jyly «Qurmet» ordenine ıe boldy. Salada 39 jyl boıy eńbek etip kele jatqan ǵalym-agronomnyń tabystary kópshilikke málim.
Bul kúnde suranysqa ıe bolyp otyrǵan daqyldardyń birneshe sortyn oılap tapqan ǵalym-agronom ósimdikterdiń ónimdiligin kózdeı otyryp, soltústik aýa raıyna tózimdi bolýyn da eskeredi. Jazdyq jumsaq bıdaıdy ósirý jáne zamanaýı tehnologııalardy engizý boıynsha ázirlegen oqý quraly aýyl sharýashylyǵy ǵylymyna qosqan mańyzdy úlesi.
«Áriptesterim ár jyl saıyn qandaı tuqym egý qajettigi týraly jıi suraıdy», deıdi Fanıl Rıfkatovıch, «bul óte mańyzdy másele. Túpki nátıjege tuqymdy durys tańdaı bilý de áser etetindigin dáleldeýdiń qajeti joq. Menińshe, óńir aýa raıynyń ereksheligine oraı qurǵaqshylyqqa tózimdi, aýrýǵa boı aldyrmaıtyn, ónimdi meılinshe kóp beretin tuqym bolǵany jón ǵoı».
Ǵalym-agronomnyń tabandy eńbeginiń arqasynda soltústik dıqandary kóptep qoldanatyn jańa tuqymdar el yryzdyǵyn eseleýge sebepshi bolyp tur.
Atbasar aýdany,Aqmola oblysy