Bıyl eldegi ındýstrııalandyrý qarqyny aıtarlyqtaı joǵary boldy. El aýmaǵynda jalpy quny 1,5 trln teńgeni quraıtyn 190 joba iske qosylyp, nátıjesinde 20,1 myń jańa jumys orny ashylmaq. Jobalar tolyq qýatyna shyqqanda óndiris kólemi 2,2 trln teńgege deıin ósedi dep kútiledi, dep jazady Egemen.kz.
2024 jyldyń ózinde 1,2 trln teńgege baǵalanǵan 180 ındýstrııalyq joba iske asyryldy. О́ńdeý ónerkásibin otandyq shıkizatpen qamtamasyz etýge arnalǵan jańa tetikter salanyń damýyn jedeldetýge jáne kásiporyndardyń turaqty jumysyn qamtamasyz etýge múmkindik berdi.
Mashına jasaý salasynyń 2028 jylǵa deıingi keshendi jospary oryndalǵan jaǵdaıda, bul sektordyń jalpy qosylǵan quny 4,5 esege deıin artýy múmkin. О́nerkásip jáne qurylys mınıstrliginiń málimetinshe, 2025 jyly iske asyrylatyn ındýstrııalyq jobalar sany sońǵy bes jyldaǵy eń joǵary deńgeıge jetedi. Bul jobalardyń basym bóligi jańa jumys oryndaryn ashyp qana qoımaı, óńdeý ónerkásibiniń eksporttyq áleýetin kúsheıtýge baǵyttalǵan.
Qazaqstan hımııa salasyn da belsendi túrde damytyp jatyr. Elde sýtegi peroksıdi, suıyq shyny, kúkirt qyshqyly, mıneraldy tyńaıtqyshtar, polıpropılen jáne sary fosfor óndirisin keńeıtý josparlanýda. Bul qadamdar otandyq hımııa ónimderiniń básekege qabilettiligin arttyryp, ımportty azaıtýǵa jol ashady.
2025–2035 jyldarǵa arnalǵan jospar sheńberinde metallýrgııa, mashına jasaý jáne hımııa ónerkásibinde 9 iri joba júzege asyrylady. Qýatyna tolyq shyqqan kezde olar jylyna 7,3 mlrd dollar kóleminde ónim óndirýge múmkindik beredi. Osy maqsatta 6 trln teńge ınvestısııa tartylyp, 12 myń jumys orny ashylady. Bul – Prezıdent tapsyrmasymen ázirlengen, jalpy 25 myń jańa jumys ornyn qurýdy kózdeıtin 17 iri jobanyń bir bóligi.
О́nerkásip jáne qurylys mınıstriniń aıtýynsha, avtomobıl qurastyrý zaýyttary, ystyq brıkettelgen temir óndirý kásiporyndary, mys balqytý zaýyty, ammıak-karbamıd kesheni, kalıı tuzdaryn baıytý-óndiristik keshen jáne gıdrometallýrgııa zaýyty sııaqty mańyzdy nysandar iske qosylady. Bul kásiporyndar otandyq mashına jasaý salasy úshin jańa ónim shyǵarýdy qamtamasyz etip, elimizdiń ónerkásiptik áleýetin edáýir arttyrady.
Atalǵan jobalardyń ishinen eki nysan 2025 jyly paıdalanýǵa beriledi: • Qostanaı oblysyndaǵy KIA zaýyty – 1 500 jumys orny, jylyna 70 myń kólik; • Almatydaǵy mýltıbrendti avtozaýyt (Changan, Chery, Haval) – 3 600 jumys orny, jylyna 90 myń kólik.
Jańa óndiris oryndarynyń arqasynda 2025 jyly avtomobıl salasynyń óndiris kólemi 5%-ǵa ósip, 149 myń jeńil kólik qurastyrý josparlanyp otyr (2024 jyly – 134 myń).
О́ńdeý ónerkásibinde sońǵy bes jylda alǵash ret 5,9% ósim tirkeldi. Bul metallýrgııadaǵy (+6,9%), mashına jasaýdaǵy (+9,7%), hımııa ónerkásibindegi (+7,7%) jáne basqa da salalardaǵy óndiris kóleminiń artýymen baılanysty. 2024 jyly jalpy óndiris kólemi 24,5 trln teńgege jetti.
Tústi jáne qara metallýrgııada da turaqty ósim bar. Mys, alıýmınıı, sınk, qorǵasyn óndirisiniń artýy men qurylys materıaldary naryǵynyń keńeıýi ishki suranysty qamtamasyz etip qana qoımaı, eksporttyq múmkindikterdi de ulǵaıtady.
Qazir Qazaqstanda ındýstrııalyq jobalardy ornalastyrý úshin 15 arnaıy ekonomıkalyq aımaq jáne 51 ındýstrııalyq aımaq jumys isteıdi. 2025 jyly olardyń bazasynda taǵy 110 joba júzege asyrylmaq. Sońǵy jyldary shaǵyn ónerkásip aımaqtary da damyp keledi. Kásipkerlerge daıyn óndiristik oryndar, jeńildetilgen nesıe men tıimdi jaldaý sharttaryn usynatyn bul aımaqtar búginde 8 óńirde 34-ke jetti. 2025 jyly olardyń sany 14 óńirge deıin kóbeıedi.
2024 jyly óńdeý ónerkásibinde 163 joba, taý-ken sektorynda 17 joba iske qosyldy. Jobalarǵa salynǵan jalpy ınvestısııa kólemi 1,3 trln teńgeden asty. Jańa óndiris oryndarynyń kóptep ashylýy boıynsha Túrkistan, Almaty, Jambyl, Qostanaı, Qyzylorda jáne Soltústik Qazaqstan oblystary, sondaı-aq Almaty men Shymkent qalalary aldyńǵy qatarda boldy.
Jalpy alǵanda, ındýstrııalyq damý el ekonomıkasynyń turaqty ósimin qamtamasyz etýde sheshýshi ról atqaryp otyr. Jańa kásiporyndardyń iske qosylýy, óndiristiń ulǵaıýy jáne ımportqa táýeldiliktiń tómendeýi – Qazaqstannyń ónerkásiptik jańǵyrýynyń naqty nátıjesi.