Aqtaýda Mańǵystaý oblystyq mádenıet, tilderdi damytý jáne arhıv isi basqarmasynyń granttyq tapsyrysymen Túrkııa memleketinde bir aıǵa jýyq shyǵarmashylyq saparda bolǵan sýretshilerdiń art-ekspedısııasy aıasynda «Túrik ǵajaptary» atty sýret kórmesi ótti, dep habarlaıdy Egemen.kz.
Kórmede ekspedısııa qatysýshylary Túrkııa aýmaǵynda jazylǵan týyndylaryn kópshilik nazaryna usyndy. Sapar barysynda sýretshiler eldiń tabıǵaty men tarıhı oryndaryn etıýd janrynda beınelep, kásibı sheberlikterin arttyrdy.
«Bıyl óńirlik mádenıet, tilderdi damytý jáne arhıv isi basqarmasy 4 granttyq jobany júzege asyryp jatyr. Sol jobalardyń ishinde erekshelenetini – «Túrik ǵajaptary» sýretshiler art-ekspedısııasy. Buǵan deıin bul joba Qyrǵyzstan men О́zbekstan aýmaǵynda ótken bolatyn. Bul ekspedısııa sýretshilerdiń ónerge, týǵan el men jerge degen qurmeti men súıispenshiliginiń arqasynda turaqty túrde iske asyp keledi. «Aqtaý – túrki áleminiń mádenı astanasy» atanǵan mereıli jyl aıasynda biz qyrǵyz áriptesterimizben kelisip, Túrkııaǵa mádenı issapar uıymdastyrdyq. Sol saparda jasalǵan jumystyń nátıjesinde búgin osyndaı ásem, kóz súısindirer týyndylardy tamashalap otyrmyz. Bul jobada sýretshilerdiń eńbegi erekshe. Olarǵa alǵys bildiremiz», dedi Mańǵystaý oblystyq mádenıet, tilderdi damytý jáne arhıv isi basqarmasy basshysy Nurtas Salı.
Art ekspedısııa jetekshisi Tynyshbek Baltabaev bul sapardyń mádenı mańyzdylyǵyn atap ótti. Ol óz sózinde jobanyń Mańǵystaý óńirindegi Otpan taýda bastalǵanyn jáne onyń mádenıet pen órkenıetti nasıhattaýdy maqsat etkenin jetkizdi.
«Alǵashqy jobamyz Qazaqstandaǵy Mańǵystaý óńirindegi Otpan taýdan bastaldy. Keıin О́zbekstannyń Tashkent qalasynda bir kúndik baǵdarlama júzege asty. Ekspedısııanyń maqsaty – elimizdiń mádenıeti men órkenıetin nasıhattaý, etıýd janryn damytý, túrli ulttar arasyndaǵy dostyqty nyǵaıtý jáne jas sýretshilerge úlgi bolý. Bul sapar barysynda Qyrǵyzstannan 2, Mańǵystaýdan 4 sýretshi qatysyp, nátıjesinde 60-70 jýyq shyǵarma dúnıege keldi», dedi art ekspedısııa jetekshisi Tynyshbek Baltabaev.