*Elimizde agroónerkásip keshenin qoldaý isi toqtamaıdy. «QazAgro» Ulttyq basqarýshy holdıngi» AQ basqarmasy tóraǵasynyń mindetin atqarýshy Dáýren Mahajanovtyń aıtýynsha, ótken jyly sektor 222 mlrd. teńgege qarjylandyrylǵan. Qurylymnyń ınvestısııalyq qorjynynda qazirgi tańda jalpy quny 309 mlrd. teńge bolatyn 477 joba bar, olardyń ishinde 365 joba jumys istep jatyr.
*Memlekettik organdardy qamtamasyz etýge baǵyttalǵan shyǵyndar 9 paıyzǵa tómendetildi. Qarjy mınıstri Baqyt Sultanov atap ótkendeı, IIM jelisi boıynsha qamtamasyz etýge arnalǵan shyǵyndar – 40 mlrd. teńgege, Qarjy mınıstrligi boıynsha – 3,5 mlrd. teńgege, Bilim jáne ǵylym mınıstrligi boıynsha 2,3 mlrd. teńgege qysqarady.
*Astanada stýdentterden quralǵan quqyq qorǵaý otrıadtarynyń quramyna 200 adam qosyldy. Eske salaıyq, jastar arasyndaǵy quqyq buzýshylyqtyń aldyn alý, quqyqtyq mádenıetti kóterý maqsatynda qalalyq ishki ister departamenti men jastar saıasaty basqarmasynyń bastamasymen qolǵa alynǵan «Stýdentterdiń quqyq qorǵaý otrıadtary» jobasy aıasynda byltyr 20-dan astam reıd ótkizilip, 100-den artyq ákimshilik quqyq buzýshylyq tirkeldi.
*Almaty oblysynda 2020 jylǵa deıin 245 jańa balabaqsha ashylady. Aımaq basshysy Amandyq Batalovtyń sózine qaraǵanda, 133 balabaqsha jeke ınvestısııa tartý arqyly salynbaq. Aıta keteıik, búginde óńirde 752 kúndizgi jalpy bilim berý mektebi, 283 balabaqsha, 67 kolledj ben 3 JOO jumys isteıdi.
*Shymkenttegi iri saýda oryndary «Qazaqstanda jasalǵan» aksııasyna qosyldy. Ońtústik Qazaqstan oblystyq ákimdiginiń baspasóz qyzmeti habarlaǵandaı, shahardaǵy «Fırkan», «Shahan» saýda ortalyqtarynda otandyq ónim óndirýshi kompanııalar men kásiporyndardy qoldaý maqsatynda uıymdastyrylǵan sharaǵa turǵyndar biraýyzdan qoldaý bildirip, elimizde óndirilgen azyq-túlikter men turmystyq zattardy satyp alýda belsendilik tanytýda.
Habarlar Úkimet, oblystyq ákimdikter saıttary, «QazAqparat» agenttigi jáne «24kz» telearnasy derekteri boıynsha daıyndaldy.