Aýyl sharýashylyǵy eńbekkerleriniń ekinshi forýmynda Prezıdent Jarlyǵymen Jaqsy aýdanyna qarasty Belaǵash aýylynyń saýynshysy Valentına Gorodova «Qurmet» ordenine ıe boldy, dep jazady Egemen.kz.
Valentına Vasılevna bar sharýasyna meılinshe muqııat, eńbekqor adam. Osy adal eńbeginiń arqasynda áriptesteriniń arasynda shynaıy qurmet pen bedelge ıe. Malsaq jannyń eńbeginiń arqasynda birneshe jyl boıy buzaýlary shetinegen emes. Ár saýyn sıyrdan 176 978 keli sút saýyp, kósh bastap keledi. Eńbegi de elenbeı qalǵan emes, 2023 jyly Aýyl sharýashylyǵy mınıstrliginiń Qurmet gramotasymen marapattaldy. 2022 jyly aýdandaǵy «Úzdik buzaýshy» atalymy boıynsha aýdan ákiminiń Alǵys hatyna ıe boldy.
– Seriktestikte taban aýdarmastan jıyrma jyl boıy jumys istep kelemin. Ras, saýynshy bolý ońaı emes. «Sıyrdyń súti tilinde» degen sóz bar. Zer salyp oılap qarasańyz, shynynda da solaı. Árıne, iri qaranyń tuqymy áser etetin de bolar, degenmen, baqqan malyńnyń ıgiligin kórý úshin jan aıamaı jumys isteý kerek, – deıdi Valentına Gorodova, – qazir jyldar boıy jınaǵan tájirıbemdi jastarǵa úıretip júrmin. Yrys umtylǵanǵa úıiriledi. Kez kelgen mamandyq qadirli. Bozala tańnan turyp, sıyr saýyp, adal eńbek etetin adamdardyń atqarǵan jumysy elenýi qanat bitiredi. Eger dál osyndaı kózqaras bolsa aýyl jastary da bul mamandyqty qurmetti sanap, jumys ister edi. «Belaǵash» seriktestigi aýdandaǵy irgeli sharýashylyqtyń biri. Bul jerde bizge barlyq jaǵdaı jasalyp otyr.
Saýynshy ózine júktelgen mindetti meılinshe jaýapkershilikpen atqarady. Bálkim, tabys syry da osynda jatqan shyǵar. Ortaq iske jan-tánimen berilýi búginde balbarmaq saýynshyny úshpaqqa shyǵaryp otyr. О́ndiristik mindetterdi múltiksiz ári tabysty oryndap, turaqty nátıjege qol jetkizý úshin tabandylyq kerek ekendigi belgili. «Maldyń jaıyn baqqan biledi» degendeı, kúndelikti jumysyn tap-tuınaqtaı etip atqaratynyń arqasynda yryzdyq molshylyǵyn jasap, tólin aman ósirip, ozattar qataryna qosylýmen birge, otbasynda da úlgili jan. Aýyldastary baqytyn eńbekten tapqan adamǵa zor qurmetpen qaraıdy.
– Osy jyldy «Jumysshy mamandyqtary jyly» dep atap, qarapaıym adamdardyń adal eńbegine kóńil aýdarý el bolashaǵyn oılaǵan kóregendikten týyndap otyr, – deıdi saýynshy, – eseli eńbek el nazarynan tys qalmaı, árkim óziniń baǵasyn alatyn bolsa, jastar da eńbektiń qadirin biler edi.
Jaqsy aýdany,Aqmola oblysy