Bul joly ań-qus kezdese qoımady. Kúzge salym asyr salǵan aıý ataýly da apanyna kirip, qysqy uıqyǵa ketse kerek. Batys Altaıdyń bytysqan taıgasyna tikushaqpen reıd jasap kelemiz. Bári alaqandaǵydaı. Zańsyz aǵash kesip, ań aýlaǵan qaskóıler kezdese qalsa, borttaǵy ınspektorlardan qutylyp ketýi ekitalaı.
Kezekti reıdke oblystyq orman sharýashylyǵy jáne janýarlar dúnıesi aýmaqtyq ınspeksııasy men tabıǵatty qorǵaý polısııasynyń mamandary shyqqan. Qyraǵy kózder qybyr etken qımyldy qalt jibermek emes. О́tken aıda tórt áýe reıdi jasalyp, 9 dana maıqaraǵaıdy zańsyz keskeni anyqtalǵan. Jyl basynan beri tabıǵatqa zııan tıgizgen 200 azamatqa ákimshilik hattama toltyrylyp, 2 qylmystyq is qozǵalypty. Az kórsetkish emes.
Qatpar-qatpar taý-tasty aralaı ushyp shyqtyq ta, Batys Altaıdyń qoınaýynan bastaý alatyn Úbi ózenin boılaı jóneldik. Móp-móldir ózenniń qaptaly qalyń qaraǵaı, qaıyń... Bir ýaqytta tikushaq shuǵyl aınaldy-daǵy, ózen jaǵasyndaǵy shaǵyl tasty alańqaıǵa qona ketti. Jaǵada balyqtan balyqshy kóp. Qazdaı tizilip, qarmaq laqtyryp tur. О́kinishtisi, balyqshylar jaıǵasqan tus qoqysqa toly. Inspektorlar eskertý jasap, tabıǵatty taza ustaý kerektigin esterine saldy. Túsingen adam qoqys tastamasa kerek.
Qalta telefondaǵy kartaǵa qarap otyrmyz, Úbi bastaý alyp jatqan jaqqa qaraı ushtyq. Ań jortqan kór qýys. Adam aıaǵy baspaǵan jer osy shyǵar deı bergenimde, syńar soqpaqpen aýyr júk kóligi júıtkip barady eken. Ákki ushqyshtar kese-kóldeneń jolǵa qona ketti. Inspektorlar ytqyp-ytqyp shyqty-daǵy toqtaǵan kólikke júgire jóneldi. Tekserý kezinde eki qap jańa aýlanǵan balyq shyqty. Onyń ústine qarmaqpen emes, ruqsat etilmegen shanyshqy temirmen aýlaǵan. Mundaıda zań qatal. Tabıǵat janashyrlary zańǵa sáıkes Ákimshilik kodekstiń 383-baby, 3-bóligi boıynsha hattama toltyryp, sotqa joldady.
Aıtqandaı, áýeden jasalatyn reıd jumystary áli jalǵasady. Sondyqtan tabıǵatta tártip buzyp, san soǵyp qalmańyzdar!
Shyǵys Qazaqstan oblysy,
Rıdder qalasy