Dımash Qudaıbergenniń Eýropadaǵy jeke konsertterimen qatar, 12-17 qarasha aralyǵynda «JULDYZ» kórmesi ótti. Ekspozısııada sýretshi Punktgeläut ánshiniń ómiri men shyǵarmashylyǵynan syr shertetin týyndylaryn usyndy, dep habarlaıdy Egemen.kz.
Berlındegi Erster Erster galereıasy osy aptada óner súıer qaýym men qala qonaqtaryn erekshe atmosferaǵa bóledi. Max-Schmeling-Halle arenasyna jaqyn ornalasqan galereıada ashylǵan kórmede maıly boıaýmen jáne qaryndashpen salynǵan jumystar kórermen nazaryna usynylǵan.
Sýretshi Punktgeläut týyndylarynda Dımashtyń sahnadaǵy jarqyn sátteri men shyǵarmashylyq belesteri kórinis tabady.
Kórmede Dımashtyń ózinen bólek, onyń ata-anasy, Raýshan Qudaıbergen men Rasýl Ýsmanovtyń da portretteri qoıylǵan.
Avtordyń aıtýynsha, Dımashtyń daýys múmkindigi men ónerdegi orny – janr ataýlydan bıik.
«Berlındegi alǵashqy konsertine oraı ázirlengen bul toptama – mýzykalyq fenomenniń álemdik yqpalyn kórsetetin shaǵyn syı. Dımash tek gastroldik saparlarymen ǵana emes, qoǵam men mádenıetke qatysty mańyzdy máselelerge ún qosatyn erekshe tulǵa. Ol – beıbitshilikti qoldaýshy, bilimge janashyr, jas ónerpazdarǵa jol ashatyn jarqyn tulǵa», deıdi sýretshi.
Aıta keteıik, satylymynan túsetin qarajattyń jartysy Qazaqstandaǵy bilim men ekologııa baǵytyndaǵy jobalardy júzege asyratyn «Sábı» qorynyń ıgiligine aýdarylady.