Astanada turǵyn úı kesheniniń syrtqy kirpish qaptamasynyń bir bóligi basyna qulap, jaraqat alǵan Uldana Myrzýan kóz jumdy, dep habarlaıdy Egemen.kz.
Astana qalalyq qoǵamdyq densaýlyq saqtaý basqarmasynyń málimetinshe, feldsher óziniń kásibı mindetterin oryndaý kezinde aýyr jaraqat alǵan.
«18 qarashada óziniń kásibı mindetterin oryndaý kezinde aýyr jaraqat alǵan feldsher – áriptesimiz qaıtys bolǵanyn qaıǵyra aıtamyz. Turǵyn úı kesheniniń syrtqy kirpish qaptamasynyń bir bóligi qulaǵan kezde zardap shekkenderge medısınalyq kómek kórsete otyryp, ózi de aýyr jaraqat alyp, óte aýyr jaǵdaıda aýrýhanaǵa jetkizildi», delingen habarlamada.
8 qarashadan bastap jansaqtaý bóliminde aýyr jaǵdaıda jatqan naýqasqa barlyq qajetti medısınalyq kómek kórsetilgen.
«Qoǵamdyq densaýlyq saqtaý basqarmasy jáne barlyq medısınalyq qaýymdastyq marqumnyń týǵan-týystary men jaqyndaryna shyn júrekten kóńil aıtady. Qaıǵyǵa ortaqtasyp, aýyr qazaǵa kóńil bildiredi», delingen habarlamada.
Esterińizge sala keteıik, 8 qarashada Astanadaǵy Táýelsizdik dańǵyly, 24B meken-jaıyndaǵy toǵyz qabatty ǵımarattyń qasbetinen kirpish jabyny qulady. Saldarynan bes adam jaraqat alyp, №1 jalpy aýrýhanaǵa jetkizilgen.