Qazaqstannyń 12 jastaǵy turǵyny, ánshi Jasmına Túzelova «Golos. Detı» mýzykalyq shoýynyń fınalyna joldama aldy. Bul týraly jas oryndaýshy óziniń áleýmettik jelidegi paraqshasynda habarlady.
Jasmına fınalǵa ótkenin qýanyshpen bólisip, bul kezeńniń óz ómirindegi eń áserli sátterdiń biri ekenin atap ótti.
– Men «Golos. Detı» fınalyna óttim! Bul óte jaýapty ári tolqytqan kezeń boldy. Keremet qatysýshylarmen birge án saldym, bul naǵyz mýzykalyq merekege aınaldy. Qoldaý kórsetkenderińizge raqmet, alda fınal! – dep jazdy ol.
Ánshiniń vokal sahnasyndaǵy joly erte bastalǵan. Anasy Gúlzııanyń aıtýynsha, qyzynyń mýzykalyq qabileti tórt jasynda baıqalǵan.
– Ol kishkentaı kezinde “Balapan” arnasyndaǵy ánderdi dál aıta bastady. Dybysty tap basatyn, daýysy taza ári ashyq bolatyn. Mýzykant retinde muny birden sezdim, – deıdi ol.
Túzelovtar otbasynda Jasmınanyń jobaǵa qatysýy ortaq is retinde qabyldanady. Týǵan-týystary repertýar tańdaýǵa, sahnalyq beınelerge, áleýmettik jelilerge qoldaý kórsetedi.
– Biz ony búkil otbasymyzben qoldaımyz. Aǵalary men apaılary da kómektesedi, biri áleýmettik jelilerdi júrgizedi, biri sahnalyq obrazyn oılastyrady, biri án tańdaýǵa ıdeıa beredi. Ár pikirdi tyńdap, pedagogpen birge aqyldasyp sheshim qabyldaımyz. Sahnaǵa shyqqanda árdaıym janynda bolýǵa tyrysamyz. Onyń kásibı ósýine úlken úles qosqan – ustazy Karına Karenına, – dedi Gúlzııa.
Jobany oqý jáne jattyǵýmen qatar alyp júrý ońaı bolmaǵanymen, mektep pen mýzyka mektebi qoldaý kórsetip keledi. Ánshi voleıboldy jaqsy kóredi jáne sportpen de belsendi aınalysady.
– Mundaı úlken jobalarǵa qatysý kóp kúsh pen tózimdilik talap etedi. Biz de qatty ýaıymdadyq. Qyzymnyń fınalǵa ótkenin estigende bárimizdiń kózimizge jas keldi, bul qýanyshty sózben jetkizý qıyn, – dedi Gúlzııa.
Gúlzııanyń aıtýynsha, Jasmına ómirde ashyq, kóńildi, kópshil qyz.
– Sahnada júregimen án aıtady, sezimin jasyrmaı jetkizedi. Tyńdarman onyń shynaıylyǵyn birden sezedi. О́mirde – meıirimdi, kóńildi, otbasynyń kenjesi, erkesi. Eshnárseni júregine jaqyn almaıdy, renishti tez umytady, – deıdi ol.
Sahnaǵa shyǵar aldynda anasy árdaıym qyzyna demeý beredi.
Jasmınanyń ustazy Gúlmıra Seıitovanyń aıtýynsha, sońǵy eki jylda ánshiniń kásibı deńgeıi aıtarlyqtaı ósken.
– Jasmın maǵan kelgende-aq jobalarǵa qatysqan, tájirıbesi bar bolatyn. Daýysy kúshti, jasyna saı dıapazony keń. Biz tehnıkasyn kúsheıttik, repertýaryn keńeıttik, mýzykany túsinip aıtýǵa úırenip jatyr. Jasmın óte maqsatshyl, batyl, tózimdi. Psıhologııalyq turaqtylyǵy da baıqaýlarǵa qatysý úshin óte mańyzdy, – dedi pedagog.
Ustazdyń aıtýynsha, bir jyl buryn Jasmına osy «Golos» jobasyna qatysa almaǵan.
– Ár nárseniń óz ýaqyty bar. Bıyl ol barlyq jaǵynan daıyn bolyp keldi. Osy bir jyldyń ishinde birneshe baıqaýda jeńiske jetti, úlken konsertterge qatysty. Máskeýge barǵan kezde moraldyq, fızıkalyq jáne vokaldyq turǵydan tolyq daıyn boldy, – dedi Gúlmıra.
Ol jobanyń fınaly eń áserli kezeń bolýy múmkin ekenin aıtty.
– Jasmınanyń joly bolatynyna senemin. “Golos” – onyń shyǵarmashylyq jolyndaǵy bir qadam ǵana. Alda áli talaı joba, baıqaý, úlken sahnalar bar. Ol nebári 12 jasta, eń qyzyǵy áli alda, – dep túıindedi pedagog.
Jasmınanyń anasy qyzdyń aldaǵy josparlarymen de bólisti.
– Ol mýzykant bolýdy shyn júrekten qalaıdy. Sportty da jaqsy kóredi. Oqýda da alda. Qyzyǵýshylyǵy bar ár nársede ózin damytqysy keledi. Al múmkindikter ashylǵanda olardy paıdalaný kerek. Bizdiń mindetimiz – qoldaý kórsetý. Josparda – úlken sahnalardy baǵyndyrý, álemdi sharlaý, óner qýanyshymen búkil otbasymyz birge júrý, – dedi ol.
Shoýdyń fınaly 28 qarashada ótedi.