Astana Hub halyqaralyq ınnovasııalyq klasteri men Sıfrlyq ındýstrııalar akademııasy birlesip, «Neırojelilerdi paıdalana otyryp, brend qalyptastyrý» atty bilim berý jobasyn iske qosty, dep habarlaıdy Egemen.kz.
Kýrstyń maqsaty – qazaqstandyqtarǵa jasandy ıntellektiniń múmkindikterin jeke brendin, bıznesin jáne shyǵarmashylyq jobalaryn damytý úshin tıimdi paıdalanýdy úıretý.
Astana Hub sıfrlyq bilim berýdi jáne JI-quzyretterdi damytý baǵyttaryn belsendi túrde ilgeriletip keledi. Buǵan deıin iske qosylǵan «JI negizderi: ChatGPT», «Derekterdi taldaý jáne Python negizderi», «Prompt-ınjınırıng negizderi» jáne QazCoders syndy seriktestik onlaın-kýrstar on myńdaǵan qazaqstandyqtarǵa zamanaýı sıfrlyq mamandyqtar men quraldardy meńgerýge múmkindik bergen bolatyn.
Jańa oqý baǵdarlamasy tórt apta boıy onlaın formatta ótedi jáne 20 beınesabaqtan turady. Sabaqtarda naqty keıster taldanyp, qosymsha materıaldar usynylady.
Format qatysýshylarǵa ózine yńǵaıly ýaqytta oqýǵa jáne jumyspen nemese oqýymen qatar úılestirýge múmkindik beredi. Kýrs bastapqy deńgeıdegi mamandarǵa, dızaınerlerge, marketologtarǵa jáne kásipkerlerge arnalǵan.
– Bul Astana Hub-ta júzege asyrylyp jatqan seriktestik jobalardyń alǵashqysy emes. Biz zamanaýı sıfrlyq mamandyqtarǵa degen qyzyǵýshylyqtyń qanshalyqty joǵary ekenin kórip otyrmyz jáne qatysýshylarǵa tek bilim ǵana emes, jumysta birden qoldanýǵa bolatyn naqty quraldardy usynýǵa tyrysamyz. JI-dy paıdalaný arqyly brend-dızaın boıynsha kýrs qazaqstandyqtardyń tehnologııalyq daǵdylaryn damytýdaǵy mıssııamyzdyń jalǵasy, – dedi Astana Hub bilim berý baǵdarlamalary keńsesiniń dırektory Alıona Slavkına.
Jańa kýrs tehnologııalardyń kreatıv ındýstrııasyn qalaı ózgertetinin túsinýge, sonymen qatar brend jasaýdyń praktıkalyq quraldaryn meńgerýge múmkindik beredi. Qatysýshylar brend strategııasyn ázirleýdi, vızýaldy júıe qurýdy, túster men qaripterdi tańdaýdy, logotıp jasaýdy, sondaı-aq Midjourney, ChatGPT jáne Canva AI sııaqty neırojelilerdi ıdeıalar, vızýaldar men mokaptar generasııalaý úshin paıdalanýdy úırenedi.
Kýrs mentory Sıfrlyq ındýstrııalar akademııasynyń tálimgeri, GForce Grey agenttiginiń art-dırektory jáne Creative Group Head mamany Daıana Moldagýlova.
– Neırojelilerdi paıdalana otyryp, brend qalyptastyrý» kýrsy Qazaqstanda jańa býyn kreatıv mamandaryn qalyptastyrý jolyndaǵy mańyzdy qadam. Kýrs qatysýshylarǵa brend-dızaıner mamandyǵynyń mánin tereń túsinýge kómektesedi: strategııa men vızýaldy júıeni jasaýdan bastap, jasandy ıntellekt quraldaryn durys qoldanýǵa deıin. Arnaıy modýl qazirgi kreatıv ındýstrııany ózgertetin JI-quraldarǵa arnalǵan, – dep atap ótti Daıana Moldagýlova.
Kýrsty aıaqtaǵan qatysýshylar sertıfıkat alyp, JI kómegimen ázirlengen mını-brendbýkpen óz portfolıosyn tolyqtyra alady. Joba qatysýshylardy tehnologııany ózin-ózi damytýǵa, bıznesin ilgeriletýge jáne jyldam ózgerip jatqan sıfrlyq álemde óz ornyn nyǵaıtýǵa shabyttandyrýǵa baǵyttalǵan.