Qazaqstannyń fýtboldan ulttyq quramasy Farer araldary komandasymen ótken joldastyq kezdesýde jeńilip qaldy, dep habarlaıdy Egemen.kz.
Kezdesý Horvatııanyń Pýle qalasynda ótti. Match 1:0 esebimen Farer araldary quramasynyń paıdasyna sheshildi. Jeńis golyn alǵashqy taımda, 25-mınýtta Petýr Knýdsen soqty.
Aıta keteıik, bul – Qazaqstan quramasynyń 2025 jyly ótkizgen sońǵy oıyny.
Eske sala ketsek, osy matchqa deıin Qazaqstan quramasy 15 qarashada Astanada ótken álem chempıonaty-2026 irikteýindegi sensasııalyq teń nátıjege qol jetkizgen bolatyn. Ol kezdesýde bizdiń komanda Belgııamen 1:1 esebimen oınady.
ÝEFA talaby boıynsha ár ulttyq qurama jyl ishinde keminde on match ótkizýi qajet. Qazaqstan bıyl segiz irikteý oıynyn jáne Belarýs quramasymen (1:4) joldastyq kezdesý ótkizgen.