Oral qalasynda Keńes Odaǵynyń batyry, qazaq halqynyń qaharman qyzy Mánshúk Mámetovanyń memorıaldyq mýzeıi 1982 jyldan beri jumys istep tur. Mýzeı tarıhı ǵımaratta, 1932–1934 jyldary Mámetovter otbasy turǵan úıde ornalasqan. Mine, osy jerde dáriger Ahmet Mámetovtiń jeke móri saqtalǵan.
Mánshúktiń ákesi Ahmet Mámetov (Ahmedǵalı Mamytuly) týraly buryn múldem aıtylmaıtyn. Onyń tanymal aǵartýshy, aqyn, Alash qaıratkeri jáne dáriger bolǵany táýelsizdik jyldary ǵana aıtylyp, nasıhattala bastady.
Ahmet Mámetovtiń ómirin eki kezeńge bólýge bolady: 1910–1915 jyldary Ýfa men Qazan qalasyndaǵy «Ǵalııa», «Hýsaınııa» medreselerinde oqyǵan Ahmet 1912–1914 jyldary «Keńes», «Ǵıbrat» atty óleń kitaptaryn shyǵarǵan. 1911–1913 jyldary «Qazaqstan» gazetine shyǵarmalary jarııalanǵan. 1917–1918 jyldary Tashkentte shyqqan «Birlik týy» gazetinde, Kúnbatys Alashorda – Oıyl ýálaıatynyń «Erkin qazaq» basylymynda, Oral gýbernelik «Qyzyl tý» gazetinde qyzmet etti. 1920 jyldardyń basynda Alash qozǵalysyna qatysty qýdalaý bastalǵanda jýrnalıstik qyzmetin tastap, múldem jańa kásipke bet burdy.
Ahmet Mámetov 1923–1927 jyldary Saratov ýnıversıtetiniń medısına fakýltetinde bilim aldy. Odan keıin Mańǵystaý, Semeı óńirinde dáriger bolyp qyzmet etti. 1930 jyly Almaty qalasynda Qazaq teri jáne juqpaly aýrýlar ǵylymı zertteý ınstıtýtynyń alǵashqy dırektory boldy. Ony Qazaqstandaǵy teri-venerologııa salasynyń negizin qalaýshylardyń biri dese de bolady. 1931–1937 jyldar aralyǵynda Oral, Almaty qalalarynda qyzmet atqardy. 1937 jyly tutqyndalyp, atý jazasyna kesildi.
Mine, mýzeıdegi mór – Alash arysynyń ómiriniń ekinshi, dárigerlik kezeńinde paıdalanǵan jádiger. Onyń mýzeı quralǵan kezde tulǵanyń jary Ámına Súleımenova tapsyrǵan bolsa kerek. Mórde sheńberdi aınaldyra «Ahmet Mametovıch MAMETOV» degen, ortada «Vrach» degen jazý bar.
Batys Qazaqstan oblysy