Májilis depýtaty Baqytjan Bazarbek jáne onyń jubaıy áleýmettik jelide taraǵan qyzmettik páter týraly daýǵa jaýap berdi, dep jazady Egemen.kz.
5 qarashada depýtattyń jubaıy Ádel Ádilova Instagram paraqshasyna qyzmettik baspanasyn tanystyryp vıdeo jarııalaǵan. Osydan keıin kóptegen qoldanýshy «olar bul úıde turmaıdy» dep pikir jazǵan.
Keıinirek jubaılar arnaıy vıdeoúndeý jasap, otbasylyq ómiri men kúndelikti tirshiligi týraly aıtty.
«Aldyńǵy Reels kóp qaraldy. Bizdi «bul depýtattyń úıi emes» dep synǵa aldy. Mine, kórip tursyzdar, sol dıvan, sol shkaf. Bizdi kishkentaıymyzdan ótirik aıtpaýǵa, shyndyqty ǵana aıtýǵa úıretti», dedi depýtat beınerolıkte. «Iá, biz osy úıde turamyz. Al heıtke sabyrmen qaraımyz. Kóp azamattyń «depýtattyń úıi» týraly ózindik túsinigi bar. Biz tek shyndyqtyń bir bóligin kórsetkimiz keldi. Sol shyndyq keıbireýge jaqpaǵan sııaqty. Bolǵany osy», dedi ol.
Depýtattyń otbasy
Jubaılardyń aıtýynsha, olar 2016 jyly tanysqan. Sol kezde Ádel Ádilova zańger qyzmetinde bolǵan, al Baqytjan Bazarbek qoǵamdyq jumystarmen aınalysyp júrgen.
Depýtattyń aıtýynsha, olardyń otbasynda mindetterdiń bólinisi degen joq.
«Bul – bizdiń úıimiz. Úıdiń taza, jaıly bolýy úshin árqaısymyz úles qosýymyz kerek. Sondyqtan Parlamentten kelgennen keıin men de úı jınaımyn», dedi ol.
Baqytjan Bazarbek týraly
1981 jyly Tarazda týǵan. 2002 jyly Qazaq memlekettik zań ýnıversıtetin «zańger» mamandyǵy boıynsha támamdaǵan. 2013 jyly Máskeýdiń halyqaralyq bıznec joǵary mektebi – MIRBIS-te «munaı-gaz salasyndaǵy ekologııalyq menedjment» baǵytynda MBA dárejesin alǵan. Sondaı-aq quqyq, ekonomıka jáne menedjment boıynsha magıstrlik bilimge ıe.