Resmı derekterdi basshylyqqa alsaq, jyl saıyn elimizde jedel respıratorlyq vırýstyq ınfeksııamen (JRVI) 3-4 mln adam, tumaýmen 2 myń adam aýyrady eken. Bıyl epıdemıologııalyq maýsym bastalǵaly elde JRVI-diń 1,5 mln jaǵdaıy tirkelgen. Jalpy, elimizdiń keıbir aımaqtarynda vırýstyq ınfeksııalar kúsheıdi degenmen, ótken jyldyń sáıkes kezeńimen salystyrǵanda kórsetkish 20%-ǵa tómen desedi.
Jalpy, JRVI-men aýyratyndardyń 66%-y – balalar, 34%-y – eresekter. Keıingi aptada elde JRVI-diń 183 myń jaǵdaıy tirkelgen. Apta ishinde oqýshylar arasynda JRVI-diń 6 myńnan astam jaǵdaıy jáne tumaýdyń 13 jaǵdaıy anyqtalypty.
Qazir áleýmettik jelilerde Gonkong dep atalatyn vırýs týraly jalǵan-shyny aralas aqparattar jyldam tarap jatyr. Saldarynan halyq arasynda tumaýdyń jańa erekshe shtammy paıda boldy degen túsinik qalyptasqany baıqalady. Shyn máninde Gonkong tumaýy vırýstyń jaqynda paıda bolǵan túri me, álde burynnan bar ma? Bul jóninde Densaýlyq saqtaý birinshi vıse-mınıstri Tımýr Sultanǵazıev baspasóz máslıhatynda resmı málimdeme jasady.
– Jalǵan aqparttardyń taralýyna baılanysty resmı túsinikteme bergim keledi. Shyn máninde Gonkong dep atalatyn A (H3N2) tumaýy jańa vırýs túri emes. Ol alǵash ret 1968 jyly anyqtaldy. Sol kezden bastap ol álem boıynsha únemi aınalymda boldy. Qazaqstan Respýblıkasynyń aýmaǵynda da bul vırýs kóp jyl boıy bar. Ony merzimdi tirkeý maýsymdyq epıdemıologııalyq prosestiń bir bóligi sanalady, – dep túsindirdi spıker.
Epıdemıologııalyq maýsym bastalǵaly beri elde tumaýdyń 590 jaǵdaıy zerthanalyq turǵydan rastalǵan. Sondaı-aq A tıpti tumaýdyń 587 jaǵdaıy tirkeldi. Densaýlyq saqtaý birinshi vıse-mınıstriniń aıtýynsha, aǵymdaǵy jyly tumaý aınalymy qazan aıynyń birinshi jartysynda bastalǵan. Bul byltyrǵy epıdemıologııalyq maýsymnan sál erterek ekenin baıqaımyz.
Búginde Densaýlyq saqtaý mınıstrligi tumaýǵa qatysy joq vırýstardyń da aınalymyna monıtorıng júrgizip jatyr eken. Nátıjesinde el boıynsha 3 myńnan astam úlgi zerttelgen. Nátıjesinde túrli vırýstyń, sonyń ishinde rınovırýs, parogrıpp, adenovırýs, bokovırýs, koronavırýs, RS vırýsynyń aınalymy anyqtalǵan. Iаǵnı, resmı aqparatqa sensek, bıyl el aýmaǵynda buryn aınalymda bolmaǵan tumaýdyń jańa túrleri anyqtalǵan joq.