Qyzylordada ótken «Inno Fest Qyzylorda − 2025» ınnovasııalyq IT jobalar saıysy taǵy bir aýyl balasynyń talabyn tanytty. Syrdarııa aýdany Shaǵan aýylyndaǵy №37 mektep-lıseıiniń 7-synyp oqýshysy Nurıslam Aıbekuly 1600 jas qatysqan jarysta «Software Dev» baǵytynda top jaryp, 1 mıllıon teńge syıaqyǵa ıe boldy.
Innovatorlar saıysynda jobasyn sátti qorǵaǵan Nurıslam 12 jasta. Informatıka, aǵylshyn jáne fızıka pánderin erekshe unatatyn ol ár taqyryptan ózine kerekti málimet alatynyn aıtady.
Nurıslam ázirlegen «Extrnos» jobasynyń ıdeıasy aǵylshyn baǵdarlamashysy Terrı Devıs jasaǵan operasııalyq júıeden bastalypty. Uıaly telefondarǵa arnalǵan qaýipsiz operasııa júıesin jasap shyǵýǵa Nurıslam 7 aı jumsaǵan. «Android» pen iOS-qa qaraǵanda myqty ári qaýipsiz bul júıe telefondy hakerlik shabýyldardan qorǵap, baılanys quralynyń jumysyn jyldamdatýǵa múmkindik beredi.
Oqýshysynyń talabyn ushtaǵan muǵalimi onyń yntasyn arttyryp, pán olımpıadalary men túrli baıqaýlarǵa qatysýyna yqpal etipti. Keıinnen Qyzylorda startaptar men IT óńirlik habynyń jetekshisi Janarys Túbekbaevtan sabaq alyp, jańa tehnologııanyń qyr-syryna qanyqty.
«Júıeni ornatý úshin telefonda «Android», «Raspberry Pi», «ARM64» arhıtektýrasy bolýy kerek. Telefonǵa ony kompıýter arqyly ornatamyz. Joba aıaqsyz qalmaıdy, áli jumys atqaramyz. Tolyq aıaqtaýǵa áli de ýaqyt qajet», deıdi jas ónertapqysh.
Qyzylorda