Almaty oblysyndaǵy iri medısınalyq uıymdardyń biri – Almaty kópsalaly klınıkalyq aýrýhanasy búginde oblys turǵyndaryna joǵary mamandandyrylǵan medısınalyq kómek kórsetetin zamanaýı ortalyqtardyń qatarynda. Halyqqa sapaly, qaýipsiz ári qoljetimdi medısınalyq qyzmet kórsetý, sondaı-aq kásibı mamandardyń áleýetin damytý arqyly emdeý sapasyn arttyrý – ujymnyń basty mindetine aınalǵan.
– Almaty kópsalaly klınıkalyq aýrýhanasy – tek emdeý ǵana emes, bilim men tájirıbe almasý ortalyǵy. Munda jas mamandar tájirıbe jınap, joǵary deńgeıli dárigerler óz biliktiligin arttyryp otyrady. Aýrýhana zamanaýı talaptarǵa saı materıaldyq-tehnıkalyq bazaǵa ıe. Aýrýhanada 360 tósek qory, birneshe klınıkalyq, dıagnostıkalyq bólimsheler bar. Quramynda terapııa, hırýrgııa, travmatologııa, neırohırýrgııa, reanımasııa, reabılıtasııa, kardıologııa, kardıohırýrgııa, ýrologııa, gınekologııa, uryqty qorǵaý ortalyǵy syndy bólimsheler jumys isteıdi. Joǵary tehnologııaly operasııalar jasaýǵa múmkindik beretin zamanaýı operasııalyq bloktar, endoskopııalyq jáne laparoskopııalyq jabdyqtar, sońǵy úlgidegi KT jáne ýltradybystyq dıagnostıkalyq apparattar ornatylǵan. Laboratorııalyq baza tolyq avtomattandyrylǵan, nátıjeler elektrondy júıe arqyly tirkeledi. Bul – medısınalyq qyzmet sapasyn arttyryp, dáriger men pasıent arasyndaǵy baılanysty jeńildetýge septigin tıgizdi, – deıdi Almaty kópsalaly klınıkalyq aýrýhanasynyń dırektory Maıra Álimbetova.
Aýrýhanada 900-ge jýyq qyzmetker jumys isteıdi. Onyń ishinde 215-i dáriger jáne 500-den astam kishi jáne orta býyn medısına mamandary. Medısınalyq quramnyń basym bóligi – tájirıbeli, joǵary sanatty dárigerler. Olardyń arasynda medısına ǵylymdarynyń doktory, magıstrler men halyqaralyq taǵylymdamadan ótken mamandar bar. Kadr saıasatynyń negizgi baǵyty – úzdiksiz bilim alý jáne kásibı ósý. Dárigerler men meıirgerler otandyq jáne sheteldik oqý ortalyqtarynda biliktiligin arttyryp, halyqaralyq standarttarǵa sáıkes tájirıbe jınaqtap otyr. Aýrýhana ishindegi trenıngter, sheberlik synyptary men tájirıbelik semınarlar mamandardyń kásibı daıyndyǵyn kúsheıtýge septesedi.
Bas dárigerdiń sózinshe bıylǵy jyly emdeý mekemesinde birqatar jańa joba júzege asyrylyp, qyzmet kórsetý deńgeıi jańa satyǵa kóterilgen. Atap aıtsaq, hırýrgııalyq baǵytta joǵary tehnologııalyq operasııalar jolǵa qoıylyp, ortopedııa jáne travmatologııa bólimshesinde jambas pen tize býyndaryn endoprotezdeý operasııalary júıeli túrde júrgizilip otyr. Operasııalar mindetti áleýmettik medısınalyq saqtandyrý júıesi (MÁMS) aıasynda tegin jasalyp, kóptegen naýqasqa qaıta júrý múmkindigin syılaǵan.
Sondaı-aq júrek-qan tamyrlary ortalyǵy jańartylǵan. Jańa angıografııalyq keshen iske qosylyp, jedel ınfarkt kezinde stent qoıý, kardıohırýrgııalyq aralasýlar jasaý múmkindigi artqandyǵy ataldy. Dıagnostıkalyq qyzmet keńeıtilip, zerthanalyq bazanyń jańartylýy, bıohımııalyq jáne genetıkalyq zertteýlerdiń jańa túrleriniń engizilýi medısınalyq qyzmettiń qoljetimdilin arttyra túsken. Ońaltý ortalyǵynda ınsýlt, jaraqat jáne operasııadan keıingi naýqastarǵa arnalǵan qalpyna keltirý baǵdarlamalary jańartylǵan. Sondaı-aq áleýmettik jobalar úzdiksiz júzege asyrylýda. Aýrýhana bazasynda «Densaýlyq festıvali», «Ashyq esik kúnderi», «Júrek aılyǵy», basqa da aksııalar uıymdastyrylyp, nátıjesinde myńdaǵan turǵyn tegin keńes pen tekserýden ótken.
Zamanaýı jetistikterge qaramastan, aýrýhana aldynda sheshimin kútken máseleler de joq emes. Qazirgi basty problema – oryn tapshylyǵy. Halyq sanynyń artýy men qala mańy turǵyndarynyń aýrýhanaǵa jıi júginýi saldarynan josparly emdelýshiler úshin oryn azdyǵy aıqyn kórinis tabýda. Oǵan mysal, emdeý mekemesine jylyna shamamen 40 myńǵa jýyq naýqas kelse, táýligine 150-ge jýyq adamǵa qyzmet kórsetiledi eken. Naýqastar sanynyń kóptigi keıde aýrýhananyń naqty qýatynan asyp túsedi. Onyń qıyndyǵyn dárigerlermen qatar, emdelýshiler de kórip otyr.
«Búırek qyzmetiniń buzylýynan densaýlyǵym nasharlap jedel járdemmen kelip tústim. Terapııa bóliminde naýqastyń kóptiginen alǵashynda oryn bolmady. 4 oryndyq palataǵa 5 tósek qoıyp, naýqastardyń aýrýynan ajyraýyna tik turyp qyzmet kórsetken terapııa bóliminiń meńgerýshisi Nazym Jaqypbaeva bastaǵan aq jeleńdi abzal jandarǵa alǵysym sheksiz. Osyndaı kópsalaly aýrýhananyń tósek orynyn kóbeıtse jón bolar edi», – deıdi emdelýshi, Kegen aýdanynyń Qurmetti azamaty Áliken Qapalbaev.
Osy kúni shekten tys júkteme men kadr tapshylyǵy da túıindi máselege aınalyp otyrǵanyn jasyrýǵa bolmas. Mamandar jetkilikti bolǵanymen, jumys kólemi óte joǵary. Bir dáriger kúnine ondaǵan naýqas qabyldaıdy. Bul fızıkalyq jáne psıhologııalyq turǵyda úlken júkteme. Aýrýhana ákimshiligi bul baǵytta naqty josparlar jasap, jańa ınvestısııalar men seriktestik jobalardy qarastyryp otyr. Bıylǵy jyl elimizde «Jumysshy mamandyqtary jyly» dep jarııalanǵany belgili. Bul bastama medısınalyq sala qyzmetkerlerine de erekshe serpin bergen.
Saıyp kelgende Almaty kópsalaly klınıkalyq aýrýhanasy – sapaly medısınalyq kómek pen adamı kapıtaldyń úılesimin kórsetetin úlgili mekeme. Munda kásibı sheberlik pen jańashyldyq qatar órbip, basty qundylyq – adam ómiri men densaýlyǵyna qaltqysyz qyzmet kórsetýde tabandylyq tanytyp keledi. Qıyndyqtarǵa qaramastan, ujym halyq senimin aqtap, jańa bıikterge umtylýda. Aldaǵy ýaqytta aýrýhana tósek qoryn ulǵaıtyp, dıagnostıkalyq jáne hırýrgııalyq qyzmetti keńeıtip, sıfrlyq densaýlyq saqtaý júıesin odan ári jetildirýdi kózdep otyr.
Almaty oblysy