«Ertiste jaqsy júze alady ekensiń...»

(Kúndelik betterinen) Jazýshy Kádirbek Segizbaev Zaısandaǵy Jarsý aýylynan ǵoı, meniń de týǵan aýylym sol jer. Úlken atalarymyz túrikpen qojalardan taraımyz dep otyratyn. Biz de aǵamyzdyń jolyn qýyp, ómiri bitpeıtin jazýdyń sońyna tústik. Aýylǵa barǵanda «Egemenge» shyqqannan oqyǵan ǵoı, «biryńǵaı jýrnalıstik jumyspen aınalys­paı, áńgimeler de jazady ekensiń ǵoı...», dep demep te qoıady. Áli esimde, QazMÝ-diń jýrnalıstıka fakýltetiniń sońǵy kýrsynda qys kezinde «Qazaq ádebıeti» gazetinde  marqum Oralhan Bókeı redaktor kezinde tájirıbeden óttim. Biraq, Almatyda qalmaı, «Pavlodar qaıdasyń?» dep soltústikke qaraı tartyp otyrdym. О́ıtkeni, 4-kýrstan soń praktıkany osy jaqta ótkenimde «oqý bitirgen soń úı beremiz, jeńildikter bar», dep marqum redaktor Baltabaı Seısenbekov shaqyrǵan edi. Sóıtip, júrgende bir kúni Kádirbek aǵamnan hat aldym: «Qaryndasym-aý, О́skemen emes, Semeı emes, Pavlodardan baryp bir-aq shyqqanyńa jol bolsyn. Ne de bolsa, áıteýir, bir Ertistiń boıy, Qara Ertistiń jaǵasynda týyp-óstim dep «aǵynǵa» qaramaı júzip kettiń be?!.», depti. Sodan, qyzyq bolǵanda, men bir jyldan keıin, 1986 jyly Túmenniń jigitine turmysqa shyqtym. Túsken jerim – Segiz seriniń, Kóshebe batyrdyń urpaqtary, Tanabas zergerdiń áýleti eken. Toıymyz ótip, Pavlodarǵa kelgen soń, biraz ýaqyttan keıin Kádirbek aǵamnan hat keldi. «Qudaı-aý, myna qara Ertistiń aǵyny seni qaıda alyp bara jatyr ózi?! Ertispen óziń jaqsy júze alady ekensiń ǵoı, Ombydan asyp, Túmenge qaraı ketkenińe qaraǵanda...», dep jazypty. Keıde, ásirese, qazir, oı toqtatqan kezde aǵany, úlkendi tyńdaǵan da durys eken ǵoı, «júzemin» dep júrip Ertiske batyp ketpegenime de shúkir, dep qoıamyn. Farıda BYQAI, «Egemen Qazaqstan».

 Nıkaragýalyq kelin

Omby aeroportynda otyrǵanmyn. 1987 jyl. Qasyma bir aǵaı kelip jaıǵasty. Kıim kıisine, jyltyraǵan sómkesine qarap, basshy kisi dep oıladym. Jubaıym Eset bılet alýǵa kassaǵa ketken. Ekeýmiz onyń Túmende turatyn áke-sheshesine bara jatyrmyz. – Qyzym, qaıda bara jatyrsyń? – dedi bir kezde álgi aǵa. Qalyń orystyń ishinde ne ǵyp júrgen qazaqtyń qyzy dedi me eken. – Túmen jaqqa, – dedim. – Qudaı-aý, ol jaqta kimiń bar edi? Jalǵyzbysyń ózi?! – dedi tańyrqap. – Joldasym bar qasymda, bıletke ketti. Ata-enem sonda turady, – deımin. – Orys pa?! – dep keketkendeı jaqtyrmaı qaldy. – Joq, qazaq, Túmende qazaqtar kóp, – dep jatyrmyn túsindirip. Túp-tamyryńdy qozǵamaı qazaq qaıbir jáı otyrsyn endi. – Zaısannyń qyzymyn deımisiń! Qudaı-aý, myna jaqqa qalaı tap bolǵansyń óziń!? Qyz Jibek pen Tólegenge uqsaǵyń kelip, nemene, sońynan erip júre bergensiń be?! Sonsha alys jerge turmysqa shyǵarmysyń!? – dep burqyldap biraz sóılep aldy. Sóıtti de, birazdan soń, ashýy basylyp, esine birdeńe tústi bilem: – Qudaı-aý, Túmendi alyssynyp otyrǵanym ne?! Aıtpaqshy, álgi bizdiń Almatydaǵy rektor aǵaıdyń qyzy el aman, jurt tynyshta sonaý jerdiń túbi – Nıkaragýadaǵy bir jigitke kúıeýge shyǵamyn dep! Olar da KazGÝ-de oqyǵan. Endi álgi qara quda-qudaǵılarǵa baraıyq desek, Nıkaragýada soǵys júrip jatqan kórinedi, – demesi bar ma?! PAVLODAR. sýret : http://kaz.gazeta.kz