Keshe Qosshy qalasynda 23 jastaǵy jedel járdem feldsheri Uldana Myrzýanmen qoshtasý rásimi ótti. О́z isine adaldyq pen adam ómirin arashalaý jolynda qaza tapqan jas maman týraly estelikter el júregin eljiretti, dep habarlaıdy Egemen.kz.
Qaraly jıyn marqumnyń Qosshydaǵy úıiniń aýlasynda ótti. Týystary, áriptesteri, kórshileri men dostary jınalyp, adamdarǵa kómektemeı qoımaıtyn, ár kez meıirimin aıamaıtyn sabyrly ári janashyr jandy sońǵy saparǵa aqtyq qurmetpen shyǵaryp saldy. Qaraly sherý aldynda onyń portretin qyzmettik formadaǵy áriptesteri kóterip júrse, artynan azaly marsh oınaǵan orkestr erdi.
Astana qalalyq densaýlyq saqtaý basqarmasynyń málimetinshe, Uldananyń qysqa ǵumyry jaqsylyq pen adamdarǵa degen janashyrlyqqa toly boldy. 2002 jyly Ońtústik Qazaqstanda týǵan ol medısına jolyn erte tańdaǵan. 2021 jyly «Danalyq» medısınalyq kolledjin úzdik aıaqtap, aldymen №5 qalalyq emhanada pedıatrııa bóliminde jumys istegen. Keıin jedel járdem qyzmetine aýysqan.
2025 jyldyń 30 qyrkúıeginde Uldana reabılıtolog-dáriger Ádilet Zeınelge turmysqa shyqqan. Jarynyń júrekti tebirentken qoshtasý sózderi áleýmettik jelide kópshiliktiń janyn terbetti.
«Shańyraǵyma sán, tirshiligime mán boldyń... Mańdaıyma syımadyń ba, perishtem, sen meniń máńgi júregimdesiń. Eshqandaı medal da, eshqandaı sóz de meniń júregimniń ıesin maǵan qaıtara almaıdy. Úıime nur, qut jáne bereke ákelgen, Alla qosqan adal jarymnyń tileýin tilegen búkil qazaq eline alǵysym sheksiz. Osy ýaqytqa deıin Alladan júregimdi aman alyp qalýyn surap, qasynda bolyp, duǵa ettim. Sabyr saqtap, bárin sabyrǵa saldym. Endigi tilegim sottyń ádil ótýi, tergeýdiń taza júrgizilýi. Qudaı qosqan qosaǵymnyń jany tynysh bolýy úshin bul isti sońyna deıin jetkizýim kerek. Jaýaptylar jazasyn alýy tıis!», dedi ol.
Esterińizge sala keteıik, 8 qarasha kúni Astanada Táýelsizdik dańǵyly 24B mekenjaıyndaǵy toǵyz qabatty úıdiń qasbetiniń kirpishteri qulap, birneshe adam jaralanǵan. Uldana birinshi bolyp jaralanǵan bala men onyń týystaryna júgirgen sátte ústine qulaǵan kirpish pen kondısıoner bekitpesi jas mamandy basyp qaldy.
Barlyǵy bes adam zardap shekti. Aýyr jaraqat alǵan feldsher 18 qarashada aýrýhanada kóz jumdy. Oqıǵa boıynsha tergeý jumystary bastaldy.
Sol kúni, 18 qarashada, Qasym-Jomart Toqaev Uldana Myrzýandy erligi men óz isine adaldyǵy úshin «Erligi úshin» medalimen nagradtady. Astana ákimdigi onyń otbasyna jan-jaqty kómek kórsetiletinin, materıaldyq qoldaý men barlyq rásim shyǵyndary óteletinin málimdedi.