Áleýmettik jelide Almatydaǵy №29 balabaqsha ashanasynda taraqandar qaptap júrgen beınejazba taraǵannan keıin mekemege birden tekseris júrgizildi. Qalalyq bilim basqarmasy tekseristiń nátıjesin málim etti, dep habarlaıdy Egemen.kz.
Áýezov aýdanynyń sanıtarlyq-epıdemıologııalyq qyzmeti júrgizgen tekserý nátıjesi boıynsha, balabaqshada birqatar sanıtarlyq talaptardyń buzylǵany anyqtalyp, mekemeniń jumysy barlyq kemshilikter tolyq joıylǵanǵa deıin toqtatyldy.
«Mektepke deıingi uıym ishinde dezınfeksııalaý jáne jaǵdaıdy sanıtarlyq talaptarǵa sáıkestendirý boıynsha keshendi sharalar júrgizilip jatyr», delingen habarlamada.
Búldirshender ýaqytsha qaladaǵy basqa balabaqshalarǵa jiberildi. Mekeme tek sanıtarlyq talaptarǵa tolyq saı kelip, tıisti organdardan ruqsat alǵannan keıin ǵana qaıta ashylady.
Bilim basqarmasynyń málimetinshe, balabaqshada dezınfeksııa men deratızasııa qyzmetteri «О́ndiristik kooperatıv» JShS-men jasalǵan kelisimshart aıasynda júıeli túrde júrgizilip kelgen. Alaıda balabaqsha mańyndaǵy qoqys jáshikteriniń ornalasýy jándikterdiń kóbeıýine túrtki bolýy múmkin ekeni de aıtyldy.