Oblys aýmaǵyndaǵy respýblıkalyq mańyzy bar joldardyń jalpy uzyndyǵy – 2 176 shaqyrym. Qysqy kezeńde respýblıkalyq joldardy kútip ustaýǵa 143 arnaıy tehnıka jumyldyrylady dep josparlanyp otyr.
Oblys ákimdiginiń málimetinshe, jeltoqsan aıynda «Taldyqorǵan – Qalbataý – О́skemen» kúre jolynyń 309 shaqyrymy qabyldanyp, qyzmet kórsetiletin joldyń uzyndyǵy 2 002 shaqyrymǵa deıin artady. Al oblys aýmaǵynda qar basý qaýpi bar 51,3 shaqyrym ýchaske anyqtalǵan. Oǵan táýlik boıy patrýldik kezekshilik uıymdastyrylmaq.
«Oblystyq mańyzy bar avtomobıl joldarynyń jalpy uzyndyǵy 1 593 shaqyrym, 22 ýchaskeden turady. Qysqa qajetti materıaldar men 98 tehnıka daıyndalǵan. Tótenshe jaǵdaılar kezinde jedel sharalar qabyldaý úshin joǵary ótimdiligi bar tehnıkalar, 7 jylytý pýnkti, qosymsha 91 jylytý orny qarastyrylǵan», deıdi oblys ákimdiginiń baspasóz qyzmeti.
Respýblıkalyq mańyzy bar joldardy kútip ustaý sapasyn arttyrý maqsatynda kóktaıǵaqqa arnalǵan jeti jańa angar-baza salynǵan. Olar Semeı, Aıagóz qalalary, Arshaly, Qalbataý, Úrjar, Qyzylkesik jáne Besqaraǵaı eldi mekenderinde ornalasqan.
Oblys ákimi Berik Ýálıdiń tóraǵalyǵymen ótken keńeıtilgen apparattyq keńeste de óńirdiń avtomobıl joldarynyń qysqy merzimge daıyndyǵy qaraldy. Jıyn barysynda óńir basshysy salaǵa jaýapty orynbasary Serik Tólenbergenovke, aýdan, qala ákimderine oblystyq jáne respýblıkalyq mańyzy bar joldardy qysqy kútip ustaý úshin tehnıkanyń jetkiliktiligine tolyq taldaý júrgizýdi, qar basý qaýpi joǵary jerlerge qosymsha tehnıka bekitip, táýlik boıy patrýldik qyzmetti uıymdastyrýdy tapsyrdy. Sonymen qatar óńirdegi jylytý jáne tamaqtandyrý pýnktterine basa nazar aýdaryp, tıisti basqarmalarǵa aldaǵy qys mezgilinde jedel járdem, órt jáne basqa qyzmetterdiń jumysyna tosqaýyl bolatyn jaǵdaıdyń barlyǵyn ýaqtyly joıýdy qatań baqylaýǵa alý qajettigin aıtty.
«Usynylǵan baıandamalar qysqa daıyndyqtyń júıeli túrde júrgizilip jatqanyn, jol-kólik qaýipsizdigin qamtamasyz etý is-sharalarynyń naqty tıimdiligin kórsetip otyr. Degenmen tehnıkalyq jabdyqtaý, qar basý qaýpi joǵary ýchaskelerdegi qaýipter, jylytý men tamaqtandyrý pýnktteriniń qarjylandyrylýy sııaqty máselelerde naqty baqylaý qajet. Barlyq tıisti qurylymdardyń úılesimdi jáne ýaqtyly áreketi qys mezgilindegi qaýipsizdiktiń basty kepili», dedi oblys ákimi.
Qazir óńirde qysqa daıyndyq sheńberinde 3 100 metr qar toqta-tý qalqandary ornatylyp, 303 ýaqytsha jol belgisi qoıyldy.
Abaı oblysy