Qarajal qalasynda №3 órt sóndirý bólimi ashylyp, saltanatty jıynǵa Tótenshe jaǵdaılar mınıstri Shyńǵys Árinov pen Ulytaý oblysynyń ákimi Dastan Ryspekov qatysty.
Jańadan ashylǵan bólim zamanaýı órt sóndirý tehnıkalarymen tolyq jabdyqtalǵan. Ǵımaratta qyzmetkerlerdiń jumys isteýine, jedel áreket etýine qolaıly jaǵdaı jasalǵan.
– Jańa órt sóndirý bólimi – joǵary talaptarǵa saı zamanaýı baza. Biz júıemizdi jetildirýdi, qutqarýshylarǵa laıyqty jaǵdaı jasaýdy jalǵastyramyz. Qalalar men aýyldarǵa birdeı, teń jaǵdaı qalyptastyryp jatyrmyz, sonda árbir turǵyn ýaqytyly jáne kásibı kómek alady, – dedi Tótenshe jaǵdaılar mınıstri.
Ulytaý oblysy ákimi Dastan Ryspekov azamattardyń amandyǵy men tynyshtyǵyn saqtaý baǵytynda atqarylyp jatqan is jalǵasyn tabatynyn aıtty. Jyl sońyna deıin oblystyń Jezqazǵan, Sátbaev qalalarynda da jańa nysandardyń ashylýyna kýá bolamyz dep josparlap otyrǵanyn jetkizdi.
Is-shara barysynda Qarajal qalasynyń ákimi Aıqyn Eleýsizov mınıstrliktiń «Azamattyq qorǵaý júıesin damytýǵa qosqan úlesi úshin» tósbelgisimen marapattaldy. Al ashylý rásiminen keıin is-sharaǵa qatysýshylar jańa nysan aýlasynda shyrsha aǵashyn otyrǵyzdy.
Ulytaý oblysy