Abaı oblysynda drondar óriste baǵýsyz jaıylǵan malǵa baılanysty jol-kólik oqıǵalaryn azaıtýǵa kómektesip jatyr.
Búginde dalaly jerlerde jol qaýipsizdigin týdyratyn negizgi máselelerdiń biri – maldyń kólik joldaryna jaqyn mańda jaıylyp, ári-beri ótýinde bolyp otyr. Ásirese, tún ýaqytynda óz aıaǵymen jaıylatyn óristegi iri-qara jıi jol-kólik shyrǵalańyna sebep bolyp, júrgizýshiler men jolaýshylardyń ómirine qaýip tóndiredi.
Abaı oblysynda bul máseleni sheshý úshin zamanaýı tehnologııalar engizile bastady. Aýdan ákimdikteriniń qoldaýymen jergilikti polısııa bólimsheleri patrýldik qyzmeti birlesip, aýmaqty turaqty baqylaýǵa jáne avtojol mańynda erkin jaıylyp júrgen maldy jedel anyqtaýǵa múmkindik beretin drondarmen jabdyqtaldy. Joǵary sapaly kamerasy bar pılotsyz alǵyr apparattar maldyń júrgen jerin anyqtap, naqty ýaqyt rejiminde kórsetip, tez áreket etýge jaǵdaı jasaıdy.
Máselen, Jańasemeı aýdanynda júrgizilgen baqylaý jumystary barysynda 59 bas jylqy anyqtalyp, jol jıeginen alystatylǵan. Mamandardyń aıtýynsha, qaraýsyz júrgen mal Semeı – О́skemen jáne Omby – Maıqapshaǵaı baǵyttaryndaǵy qozǵalysy kóp joldarda jıi kezdesken. Drondardy qoldaný bul qaýip-qaterdi aıtarlyqtaı tómendetip, óńirdegi jol qaýipsizdigi deńgeıin jaqsartýǵa múmkindik bermek.
Statıstıka da bul jumystyń tıimdiligin rastap otyr. Máselen, jyl basynan beri polısııa qyzmetkerleri maldyń qaraýsyz jaıylýyna qatysty 2 284 quqyq buzýshylyqty anyqtaǵan. Arnaıy aıypturaqtarǵa 9 729 bas mal jetkizilip, olardyń ıeleri ákimshilik quqyq buzýshylyq týraly kodekstiń 408-baby boıynsha jaýapkershilikke tartylǵan.
Árıne, bul da ońaı sharýa emes. Aıaqty maqulyq qaýip-qater degendi qaıdan uqsyn, ot qýalap jaıyla beredi. Ol úshin mal ıesiniń aıyppul arqalaýy da daý týdyrmaı turmaıtyn jaıt. Osy rette jańa tehnologııanyń múmkindikterin tıimdi paıdaǵa asyrý – qaı tarapqa da quba-qup is bolyp otyr.
«Sonymen qatar aýyl sharýashylyǵy janýarlaryn sáıkestendirý talaptarynyń buzylýyna qatysty 201 derek tirkelip, materıaldar veterınarııalyq ınspeksııaǵa joldandy. Zamanaýı tehnologııalardy profılaktıkalyq is-qımyldarmen ushtastyrý polısııaǵa oqys oqıǵalardyń aldyn alýǵa ǵana emes, mal ıeleriniń jaýapkershilik mádenıetin arttyrýǵa da múmkindik beredi. Osyndaı keshendi tásil Abaı oblysynyń joldaryn úshin anaǵurlym qaýipsiz etýge óz úlesin qosyp jatyr», deıdi oblystyq polısııa departamentiniń baspasóz qyzmeti.
Abaı oblysy