Jambyl oblysynda óndiris salasyn órkendetýge basymdyq berilip otyr. Atqarylǵan jumystyń nátıjesi de kóńil kónshitedi. Keıingi 10 aıdyń bederinde óńirde 1 trln teńgeniń ónimi óndirilgen. Bul kórsetkishpen Jambyl oblysy óńirler arasynda kósh bastap tur. Jalpy, oblys aýmaǵyndaǵy 919 kásiporynda 41 myńnan astam adam eńbek etip jatyr. Bıyl óńirde birneshe kásiporyn ashylǵan edi. Kúni keshe sol úrdis sátimen jalǵasty.
Memleket basshysynyń tapsyrmasyna sáıkes óńirde áleýetti ınvestorlardyń qolǵa alýymen birneshe óndiris oshaǵy salynyp jatyr. Olardyń keıbiri óz ónimin shyǵaryp úlgerdi. Jaqynda «Taraz» ındýstrııalyq aımaǵynda jylyna 70 myń tonna joǵary sapaly kúıdirilgen ák óndiretin kásiporyn jumysyn bastady. О́ńir basshysy Erbol Qarashókeevtiń aıtýynsha, Prezıdent pármenimen qolǵa alynǵan jumys toqtaýsyz jalǵaspaq. Jergilikti atqarýshy bılik ókilderi óńdeý salasyna ınvestısııa tartýǵa basymdyq berip otyr.
Jańadan boı kótergen zaýyttyń ınvestısııalyq quny 2 mlrd teńgeni quraıdy. Kásiporynda shamamen 100 adam eńbek etedi. Zaýyt basshylarynyń aıtýynsha, munda jumysshylardyń alańsyz eńbek etýine barlyq múmkindik qarastyrylǵan eken. Al kásiporyn jetekshileri aldaǵy ýaqytta ózge de jobalardy qolǵa alýǵa bekinip otyr.
– Búgingi bastama – el Prezıdenti júktegen mindettermen tolyq úılesetin naqty qadam. Bizdiń maqsatymyz – óńir ekonomıkasyn jańa deńgeıge kóteretin óndiris oryndarynyń sanyn arttyrý jáne ınvestorlarmen ózara tıimdi áriptestik ornatý. Sol baǵytta tynymsyz eńbek etip jatyrmyz. Búgin iske qosylǵan jańa joba – osy baǵyttaǵy mańyzdy bastamalardyń biri. Jalpy, óńirge áleýetti ınvestorlardy tartý jumysy ári qaraı da jalǵasady. Oblys ákimdigi ınfraqurylym tartý, ınjenerlik jelilermen qamtamasyz etý jáne qajetti ákimshilik qoldaý kórsetý jumystaryn oryndap otyr. Investorlar úshin qolaıly jaǵdaı qalyptastyrýdy jalǵastyramyz. Jańa óndiris orny elimizdiń jáne óńirimizdiń órkendeýine úles qosady degen senim mol, – deıdi óńir basshysy.
Kásiporyn qajetti shıkizatty jeke karerinen alady eken. Mamandardyń sózine sensek, bul qadam áktasty qazýdan bastap daıyn ónim shyǵaratyn kezeńge deıin sapany turaqty baqylaýǵa múmkindik beredi. О́nim óndirýshisi – «KazGeoEnergy». Mamandardyń aıtýynsha, jańadan salynǵan óndiris oshaǵy – óńirdegi 1-synypty ák shyǵaratyn jalǵyz kásiporyn.
– Qarataý qalasynda ken óndiretin jeke karerimiz bar. Sondyqtan bizdiń zaýytty shıkizattan daıyn ónimge deıin jumys isteıtin sıkldik óndiris oshaǵy dep aıtýǵa tolyq negiz bar. Kásiporynda shamamen 100 adam jumyspen qamtylady. Bizde eńbek etetin azamattardyń ortasha jalaqysy 350-400 myń teńgeni quraıdy, – deıdi jańa zaýyt basshysy Arystanbek Erkinbekuly.
Zaýyt zamanaýı tehnologııalarmen, ozyq qural-jabdyqtarmen jabdyqtalǵan. Onyń ishinde nemistiń «Siemens AG» monıtorıng júıesi ornatylyp, óndiristiń barlyq kezeńinde sapany joǵary dáldikpen baqylaýdy qamtamasyz etip otyr.
Munda óndiriletin kúıdirilgen ák ekonomıkanyń negizgi salalarynda keńinen qoldanylady. Naqtyraq aıtsaq, baılanystyrǵysh materıal retinde, sılıkat kirpish, sement, gazoblok, sylaq ónimderin daıyndaý kezinde kádege jaraıdy. Sondaı-aq metallýrgııada qospalardy bólip alý jáne kendi baıytý kezinde flıýs, hımııa ónerkásibinde soda, kalsıı karbıdi, asetılen, boıaý-lak ónimderin óndirýde negizgi shıkizat retinde paıdalanylady.
Jańa zaýyt óńirdiń ónerkásiptik áleýetin arttyrýdaǵy mańyzdy kásiporyndardyń sanatyna enip otyr. Ol oblys ekonomıkasynyń órkendeýine eleýli úles qosyp, jańa jumys oryndaryn ashýǵa, ımportty almastyrýǵa, otandyq ónerkásipti nyǵaıtýǵa múmkindik týǵyzady.
Taraz